Bi de letzte Presse-Konferenz in’t Ohnsorg-Theater geev dat en positiv
Twischenbilanz op de Speeltiet 2015/16. De Utlastung is op 82,4% stegen,
vergleken mit de Speeltiet 2014/15, de man blots 73,4% weer. De
Intendant Christian Seeler meen: „Sien Huus segelt ünner bannig goden
Wind.“ Mit Toversicht kickt he op siene letzt Speeltiet an dit Theater.
Ok disse Speeltiet fangt mit’n Ohnsorg-Klassiker an. De Komödie „Op
Düvels Schuuvkoor“ warrt an’n 21. August de eersten Premierengäst in’t
Theater locken. Beate Kiupel un Wolfgang Sommer warrt de Rullen vun
Heidi Kabel un Henry Vahl övernehmen. Man de Intendant truut sik ok
an swoor Themen ran, as dat de Demenz is. Na de Vörlaag vun Til Schweiger
sienen Kinohit „Honig im Kopf“ gifft dat in de plattdüütsche Spraak
„Honnig in’n Kopp“ as Eerstopföhren. Spelen warrt de dement Opa de
grootardig Schauspeler Joachim Bliese, de al veel an’t Ohnsorg-Theater
west is. Wat goot, dat Volkstheater sik ok an so swoore Stücken ranwagen
deit.
Wieder geiht dat denn mit so hööglich Komödien as „Barfoot bet an’n
Hals“ an’n 13. November 2016, „Dinner för Spinner“ an’n 8. Januar 2017,
„Fründschaftsspill“ över Football un Kinner an’n 26. Februar 2017 un mit
de Kriminalkomödie – goot bekannt bi Oold un Jung – „Arsenik un ole
Spitzen“ un dat an’n 9. April 2017. Den överkandidelten Perfesser warrt
Horst Arenthold spelen. Utklingen deit de Saison in’t grote Huus mit denSchwank vun Konrad Hansen „Een Matjes singt nich mehr“, un dat an’n
28. Mai 2017. Christian Seeler müch dormit sienen eenstigen Mentor ehren
un danken.
Man dat is ja noch lang nich allens. Dor is ja ok noch de STUDIO-Bühn,
de bi Cornelia Ehlers in best Hannen is. An’n 25. September vun dit Johr
warrt „Wöör mit Kulöör“ (Die große Wörterfabrik) wedder opnahmen –
en Höög för de ganze Familie. An’n 29. Januar 2017 gifft dat de eerst Premiere
mit „Tüdelig in’n Kopp“ (Als Oma seltsam wurde), na dat Billerbook
vun Ulf Nilsson un Eva Erikson. Jasper Brandis un Cornelia Ehlers
hebbt en hoch-plattdüütsch Theaterstück dorut maakt.
Man in’t Utland geiht dat ok, un twars in een mit de engelsch Spraak. In’t
Fröhjor 2017 geiht dat to’n eersten Mal na Kapstadt, un twars mit „Verteufelte
Zeiten“ – in Tosamenarbeit mit den Regisseur Norbert Schulze jr.
An’n 31. Juli 2017 will Christian Seeler en goot föhrt Huus an sienen Nafolger
Michael Lang geven – enen Fründ un Kollegen. Wünscht wi jem
all, dat Theater un de Minschen, de dormit to doon hebbt, dat Allerbest!

Heft Artikel von: Heise-Batt, Christa