Platt klattert mend de een of annere Kring. Et gift hier un daor een Plattdüütschdag,
veel Theaoter un weer een Plattdüütsch Week an End van
September üm den Spraokendag ümtau. Et stimmt wohl, Lüe möget Platt
gern of hella gern, man dat helpt ehr nich un al lang nich de Kultur un
Spraoke süms. Wenn een een anner Minsch so richtig mag, dann kik he/
of se den annern nipp un nau an, man nich mit de Ugen, blots mit Harte.
Dat is fein för Minschen, man läip, wenn een so nich süch/seihen will,
wo läip de anner tau Wege is. De Leevde bliff alltied jung un sprill, dat is
dat Besünnere van een krekel Leevde. Wenn een anner Minsch mend, de
is man klötterig, denn praot een daortegen; daor versteihst Du nixnich
van, dat is nich diene Platt. So is´t. Blots wenn jedereen sien eegen Platt as
siene Leevde hett, dann gift dat de Spraoke nich mehr, wenn dat eegen
Hart uphörrd tau puckern. Een Spraoke levd so as Minschen levd, wasst,
greund un jungt, wenn anner ehr anpraot, se för neie Saoken open is, neie
Wööre utbilld, sik neie Schnäcke finnen. Se mott mit de Tied sik ümmekoppeln,
ut een Ackersnacker een Handyknocken un denn een Handreckner
maoken. De een of annere mag dat nich hören, man de mott sik
nich annern. Dat is et jüs, et gift för jedereen sin Platt, d. h. uk de Spraoke
van de Jungkerlse un de van Wichter of lüttke Kinner, man tau glieker
Tied uk de van de Ölleren un dat ut jedeen Dörp. Een, de sin Platt leev
hett, mott blots taulaoten, dat Platt in Schaule lernt weert, dat jedereen
de Spraoke uk schrieben, wat ´s uppen un läsen kann. Davör brukt et
Lüe, de sik in Politik un Wetenschapp för Platt insetten daut un wecke,
de sik mit de Spraoke utkennt. Plattlehren hett kennend künnig maoken.
Mesters brukt dat Neieste an Weiten, wo een Kinner of graote Lüe plietsch
´ne Spraoke in den Kopp un up de Tung leggen kann. Et brukt dat Institut
för Nedderdüütsche Spraoke e.V. in Bremen un den Bundesraat för
Nedderdüütsch, dat de Verwalten, dat Land un de Schaulminister/sche
nich utwenzeln könnt, wenn se davör instaohn mött, Platt hörrd hierumtau
dartau. Praoten un mögen daut de Lüe in Bremen un in Bundesraat
Platt babentau uk.
Heft Artikel von: Engbers, Jutta