VÖR ANKER is dat 18. Album vun Jan Cornelius, rutkamen al 2020. De Leder sünd all in de Tiet vun 2016 bet 2019 entstahn. To sien Gesang speelt Jan Cornelius Gitarre un warrt stütt vun Christa Ehrig op Cello, Flöte, Ukulelen-Bass un Keyboard un Klaus Hagemann mit de E- oder akustische Gitarre. In’t eerste Leed vergliekt Jan Cornelius sien Leder mit »Breven« an leve Minschen, in de een sik op verleden Stünnen besinnt. Dor sünd en Reeg nodenkern Texten bi, över dat Leven, dat Güstern un dat Morgen. Üm Oostfreesland geiht dat ok, to’n Bispill mit dat Beschrieven vun en »Ogenblick« an’e Küst un dat Besünnere an’t »Platte Land«. In’t Ohr bleven is mi dat Leed vun »Tinis Sömmerköken« över en besünnern Kroog, woneem jeedeen annohmen wörr, as he oder se is, willkomen weer un sik tohuus föhlen kunn. En tragisch Geschicht vertellt dat Leed vun den »Eensam Dichter«, de en groten Roman schrieven wull. Man op’t mehrst tofaat kregen hett mi dat Leed »Raadlos hen of her«. Dat hett Jan Cornelius na den Terroranslag op den Wiehnachtsmarkt in Berlin schreven. Dor spöört een all dat Verfehren un Verwiefeln, de Bang un all de Gedanken, de op een instöten doot, un an’t Enn vun jeedeen Stroph wiest de Wöör »De Leeder helpen mi neet mehr«, wo leeg dat üm uns steiht. Ut dat Leed »Vör Anker«, no dat de CD nöömt is, kann een ruthören, dat een sik noch seker un borgen föhlen kann, solang de Gedanken noch frie sind. Dat schullen wi geern as Vermahnen verstahn, dorop optopassen. Dat gifft also en Reeg Texten to’n Nodenken. De kann een ok all in dat lütte Biheft nolesen. Man een kann ok eenfach de Musik geneten.

Jan Cornelius: VÖR ANKER, c + p ARTyCHOKE Gerd Brandt, Neustadtgödens, 2020

Heft Artikel von: Kücklich, Petra