TUSCH – „Theoter un School“ is en Projekt vun’e Hamborger Schoolbehöörd un verscheden Partners. Dorbi arbeidt hamborger Theoters mit hamborger Scholen tohoop un mookt Opföhrungen oder ok Utstellen, de mi Theoter to doon hebbt. Herr Volker Wolter, de Rekter vun’t Gymnasium Rahlstedt, hett sik as Partner dat Ohnsorg-Theoter utsöcht. Doröver heff ik mit em snackt:

He höört ok de Generatschoon to, de ehr Öllern mitnanner Platt snackt hebbt man mit jümehr Kinner Hoochdüütsch. Denn Platt weer nich goot för de School. Dat weet wi hütigendoogs beter. Herr Wolter meen, he kunn twors Platt allerbest verstohn man nich sünnerlich goot snacken. Liekers hebbt wi uns de mehrste Tiet wunnerbor op Platt ünnerholen.

Plattdüütsch steiht jo nu in’e Bildungsploons för de Scholen binnen. In vele Scholen warrt dorwegen af un an plattdüütsche Riemels leest. Herr Wolter müch geern mehr doon un hett sik för sien Theoterkurs in Johrgang ölven in’n Rahmen vun TUSCH för en Kooperatschoon mit dat Ohnsorg-Theoter mellt. Dor schüllt nu Szenen ut Goethe sien Faust op Platt inöövt un opföhrt warrn. Op mien Froog, wat denn de Schölers dorto seggt harrn, anter he, se weern all bannig neeschierig op de Sprook un harrn foorts meent: „Jo, mookt wi!“ Vun de ölven Schölers in den Kurs hebbt söben ok Wuddeln buten vun Düütschland un en tweete Muddersprook. Sünnerlich de güngen mit de niege Sprook bannig open un interesseert üm un weern överhaupt nich bang dorvör.

As Grundloog deent de Verschoon vun’n plattdüütschen Faust, de in’t Ohnsorg opföhrt worrn is, tohoop mit de Översetten vun Friedrich Hans Schaefer. Man dor schall nich dat hele Stück speelt warrn. Dat weer beten toveel. Dorwegen schüllt blots de bekanntesten Szenen opföhrt warrn. Ok de Szene in Auerbach sien Keller, de in dat Ohnsorg-Stück nich binnen weer, schall dorbi ween. Man de Szenen schüllt so verbunnen warrn, dat dat wedder en helet Stück gifft. Villicht warrt dor ok noch Musik mit bi ween.

Wieldat in den Theoterkurs mehr Deerns as Jungs binnen sünd, müssen se sik bi dat Besetten vun de Rullen wat infallen loten. So warrt as in Heinrich Heine sien „Dr. Faust“ ut den Mephistopheles en Mephistophela. Man Marthe Schwerdtlein schall denn wedder vun en Jung speelt warrn. Dor dröfft wi bannig neeschierig op ween.

In’n Rahmen vun de Kooperatschoon mit dat Ohnsorg-Theoter kümmt de Dramaturgsch Cornelia Ehlers, de dor ok dat Leit vun’e Studiobühne hett, af un an in den Ünnerricht. Se öövt mit de Schölers in’e Hauptsook de plattdüütsche Utsprook. Butendem schall dor ok noch en Schauspeeler ut dat Ohnsorg-Ensemble för en helen Dag in de School komen. De warrt denn to’n Bispeel wiesen, wo een op de Bühn richtig aten un snacken deit.

De Termine för de Opföhrn staht noch nich fast. Mag ween, dat warrt al in Harvst wat, man villicht ok eerst tokomen Johr. Herr Wolter müch dor geern en lütte Utstellung över Gustaf Gründgens mit verbinnen, de vör föfftig Johrn doot bleven is. De Mephistopheles ut „Faust“ höör jo to Gründgens sien bekannteste Rullen.

Ik heff ok noch froogt, wat noch mehr plattdüütsche Projekte an de School ploont sünd. Herr Wolter meen, dat vele vun de Schoolmeisters nich ut Noorddüütschland komen deen. Un de harrn denn keen groot Vermook an Plattdüütsch. Ok wullen se sik sachts eerstmol ankieken, wo he mit den plattdüütschen „Faust“ trechtkomen deit.

Ik wünsch bannig veel Spood un warr mi dat wiss ankieken!

Heft Artikel von: Kücklich, Petra