Slam-Slacht

An’n 29.09.2013 geev dat in’t Ohnsorg-Theoter en heel besünner Premiere: Den eersten Poetry-Slam op Platt! Utricht hett de Veranstalten de NDR. Björn Högsdal, de al foken dat Leit bi en Poetry Slam hatt harr, föhr tohoop mit Ines Barber dör den Avend. He verkloor, woans dat togahn schull: Toeerst worrn jümmers twee Deelnehmers utloost, de gegenenanner antreden schullen. Dütmool weer dat meist en bekannten Plattsnacker gegen een, de sik goot mit’n Poetry Slam utkenn un al männichmol bi een mitmookt hett. Jeedeen vun de Twee hett denn sien Text oder Texten vördrogen. Achteran müss denn dat Publikum dör sien Bifall bestimmen, wokeen en Runn wiederkomen schull. De, för den de Lüüd op’t luutst un op’t langst klatscht, schreet, fleit un trampelt hebbt, hett dat Duell wunnen un dörv denn in’e neegste Runn gegen den Winner vun en anner Poor antreden.

De Eerst weer Ilka Brüggemann vun NDR Neddersassen. Se harr dat op’t swoorst, wieldat dat Publikum noch nich so recht instimmt weer un nüms wirklich wüss, wat dor passeren schull. In ehr eerste Vertellen dreih sik dat üm de Rull vun en „Stripper“ bi‘t Renoveern un woans se rutfunnen hett, dat dat keen smucken Keerl man en Apparot to’t Tweisnieden vun Teppichen is. Ehrn tweten Text harr ik al mol in’t Radio höört. Dor güng dat üm de Idee, stoots Biller vun de Familie Gipsafdrück vun’e Bossen optohangen.

Ehr Gegensmann weer Andy Strauß ut Leer. He hett sik al en Noom in de Poetry-Slam-Szene mookt un mit Spood an männicheen Poetry Slam in heel Düütschland deelnohmen. Todem hett he Bökers un Theoterstücken schreven un ok sülvst op’e Bühne stahn. In sien Text verkloor he, dat he sien Fründin sotoseggen ut Nootwehr vun’n Kliff stöten müss. He weer jo vunwegen sovele Anteken (de een ok as normole Alldagsreaktschonen düden kunn) wies worrn, dat se em an’t Leven wull. Dat Publikum weer düt den gröttern Bifall wert.

De neegste Kandidot weer Jan Graf, foken bi NDR 90,3 in’t Radio to hören. He vertell vun en Fru in en Hospiz, de se mit Medikamenten ruhigstellt harrn, wieldat se Swien höört harr. Man de Swien geev dat würklich. Denn verkloor he noch, dat he düssen Poetry Slam afsluuts winnen müss. Dat weer jo argerlich, jümmers in’e twete Runn ruttoflegen. Dütmol flöög he al in’e eerste Runn ruut. De Riemel vun Jan Ladiges, en studeerten Gornermester, över de scheune plattdüütsche Sprook, is as’t lett in’e Harten vun’e Tohörers beter ankomen.

Denn keem wedder een ut de Regen vun’n NDR. Matthias Stührwoldt vertell vun sien Moder ehr Autofohrerkünste un ehrn Vermook an Pandbuddels. Dorgegen heel Helge Albrecht, mit 21 Johren de jüngste Deelnehmer, mit en Text över en Internetleev un wat een dorbi allens nich sehen kann. De Student speel in Sleswig plattdüütsch Theoter un hett al en poor Mol en Poetry Slam in Sleswig-Holsteen wunnen. Ok bi düssen Vergliek bleev he de Winner.

Dat letzte Poor weern de Ohnsorg-Schauspeler Nils Owe Krack un de Poetry-Slammer Sven Kamin. Niels Owe Krack föhr uns in sien Bidrag vun den schönen Sommer („Dat weer so warm, dat sogor de Rentners de Sandalen ahn Socken antrocken hebbt“) över den Harvst no Wiehnachten hen, wat een al dütlich an’e Wiehnachtsmänner ut Schokolaad in’n Supermarkt sehn kunn. De Bremer Sven Kamin vertell vun de Bedüden, de Plattdüütsch för em kregen hett, ofschoonst bi em tohuus keen Schild stünn „Wi snackt Platt!“, wieldat dor keeneen Platt snackt hett. As bi männicheen Poetry Slam vördem hett he ok hier wunnen.

No de Poos luer dat Publikum opreegt op de twete Runn.

Andy Strauß keem mit en plattdüütsche Verschoon vun Goethe sien „Zauberlehrling“ – ut de Sicht vun den Bessen. Jan Ladiges heel dorgegen mit den Bericht vun en „Överfall“ un wo he sik dat dorno goot gohn loten wull, vun dat Aventüer mit’n Campingwogen, de „blots utlehnt is, vun een de dat noch gor nich wüss“ un de Udels. Dormit harr he denn knapp de Nees vörn.

Helge Albrecht vertell denn vun sien Beleevnis mit en Nixe, de he mit no Huus nehm un in de Boodwann inquarteer. Man sien Fründin kreeg dat ruut un denn gev dat „Fisch“ to eten. In den wat nodenkern Text vun Sven Kaminer güng dat üm dat Tosomenleven vun de Minschen, dat foken nich op’t best funktschoneer. Man bi Storm seten se schulig tohoop. Düsse Bidrag bröch em in’t Finole.

In’t Finole vertell Jan Ladiges vun sien wat snaaksche „Karriere“ in verscheden Beropen, wobi dat jümmers üm dat Buddeln vun Löckers güng un en „Minibagger“ en Rull speel. Sven Kamin geev nochmol allens un wies vullen Insatz mit sien Geschicht vun’n „Winnewarp“, wo ok de Tokiekers mitmoken schullen un mitmookt hebbt. Weer dat al vördem männichmol knapp ruttofinnen, wokeen den mehrsten Bifall kregen hett, weer dat dütmol afsluuts unmööglich. Dorwegen geev dat düssen Avend twee Siegers.

De Veranstalten wies eenmol mehr, wat een mit’e plattdüütsche Sprook allens moken kann. Ok wenn dat noch poor leddige Plätz geev, hett de Poetry Slam sachts ok Lüüd antrocken, de een anners villicht nich so foken in’t Ohnsorg-Theoter drepen kann. Tominnst weern all Tokiekers heel ut’e Tüüt un hebbt orrig mitmookt bi’t Afstimmen mit Hannen, Fööt un Stimm. De Luun weer bannig goot un wat een hören kunn, sünd all heel tofreden no Huus gahn. Ik bün al an’t överleggen, wo ik dat togang krieg to den neegsten Poetry Slam op Platt in’n April 2014 no Husum to fohren.

En poor vun de Bidrääg kann een sik in’t Internett op de Siet vun’n NDR Welle Nord anhören.

Poetry Slam op Platt an’n 29.09.2013 in’t Ohnsorg-Theoter

Heft Artikel von: Kücklich, Petra