Nööm mi geern mall, dat ik an düssen dakigen Avend in’n Novembermaand för dat Plattsounds-Finale de 175 km bet na Ollenborg hen kajöölt bün. Man dat hett sik lohnt: All düsse jungen Musikers ut heel Neddersassen, de mit jümehr Musik ut de verschedensten Richten jümehr Kreativität un Spooß an Plattdüütsch wiest hebbt, mutt een beleevt hebben. Dor mööt sülvst de, de Plattdüütsch op’t leevst al to Graff dregen wüllt, togeven: De Sprook leevt! Un ok junge Lüüd vun hüüttodaags köönt dor jümehr Beleven un Dinken wunnerbor in utdrücken. De Texten reken vun de Themen Fründschop un ehr Problemen, Freetied un Party över Fantasiegeschichten bit to Plattdüütsch sülvst. Blots de lüttere Deel vun de Deelnehmers hebbt Hölp vun de Veranstalters bi’n Översetten bruukt. De mehrsten hebbt ehrn plattdüütschen Text al mitbröcht. Een Maat vun’e Band Skyline B. ut Rhauderfehn, de al 2011 den Tokiekerpries wunnen hett, vertell, he bruuk Platt bi sien Arbeid in’t Stüerbüro, wenn he mit öllere Kunnen snacken deit. De Rapper MC Minister ut Ollenborg hett mit „Kasskarn“ en heel moderne Version vun „Dat du mien Leevsten büst“ vörstellt. Bi de Band D.N.A. ut’t Emsland mit dat Leed vun „De dööstigen Mann“ de op de Söök no Snaps dör de Straten löppt, weer bannig Stimmung in’n Sool. De hebbt tominnst den Pries för de ludesten Fans verdeent. As’t lett sünd de vördem ok bannig döstig west…
Den Publikumspries vun dat Afstimmen in’t Internett hett de Deerns-Chor „Forever Young“ ut Papenborg wunnen. Bi den Text müss ik foorts an Theodor Storm sien „Över de stillen Straten“ dinken, un bi ehrn Optritt hebbt se sik lang nich so goot anhöört as in’t Internett vördem. Dat weer bi all de annern jüst annersrüm.
In’e Jury seten Lüüd, de sik sachts mit Musik un mit Plattdüütsch utkennen doot.
De hebbt den drüdden Pries an de Glamrock-Band Nightlife ut Brunswiek för jümehr Leed „Twer un Lang“ vergeven. Op den tweten Platz sünd „De Schkandolmokers“ ut Ollenborg mi jümehrn „Punk up Platt“ op ammerlänner Platt komen. Dat is een vun de Stücken, de vun Anfang an plattdüütsch weern. De Spreker vun’e Band vertell, he snack Platt mit sien Grootöllern. In beide Texten geiht dat üm Musik un de plattdüütsche Sprook un beide Stücken wiest, woveel Spooß een dormit hebben kann. Dat hett richtig gode Stimmung mookt.
Den eersten Pries hett Mirjam Blümel as „Mia blüht“ mit de Ballade „Lüttje witte Ferrer“ wunnen. De Sängersch kümmt ut Wolfenbüttel man leevt nu in Hamborg. Ik persöönlich kann mit den Text nich veel anfangen un ok de Musik un de Gesang hebbt mi nich ümhaut. Dorwegen harr ik vun de Jury bannig geern höört, wat de Kriterien weern, na de se de Priesen verdeelt hebbt. Weer villicht’n Anregen för’t neegste Mol, dor beten mehr över to vertellen.
Alltohoop weer dat’n bannig interessante Veranstalten de ok noch bannig veel Spooß mookt hett. Un ik kann mi good vörstellen, dat so Plattdüütsch as lebennige Sprook vöranbröcht warrt. Dor kann een blots seggen: „Mookt wieder so! Ik frei mi al op ‚Plattsounds 2013’!“
Plattsounds – de plattdüütsche Bandwettstriet för Musikers ut Neddersassen twüschen 15 un 30 – Finale an’n 24.11.2012 in Ollenborg
Heft Artikel von: Kücklich, Petra