De Ohnsorg Jugendclub is en Anbott vun’t hamborger Ohnsorg-Theoter för junge Lüüd twüschen 14 un 18 Johrn. De köönt dor de plattdüütsche Sprook verbunnen mit Theoter kennenlehren. Mit egen Ideen warrt denn een Theoterstück op Platt op de Been stellt. Hölp un Anholt gifft dat vun Cornelia Ehlers, de Baas vun de Ohnsorg-Studiobühne. Mit ehr heff ik över dat Stück „Opstand!“ snackt, dat de Jugendclub in’n Maimaand op de Bühn bröcht hett. Un ankeken heff ik mi dat natüürlich ok.
Verleden Harvst harrn sik üm un bi 20 junge Lüüd för den Ohnsorg Jugendclub mellt. Man welk pass de Wekendag för de Proven nich. Acht Deerns un fiev Jungs hebbt denn tohoop mit Cornelia Ehlers un Hanna Müller no George Orwell sien „Farm der Tiere“ dat Stück „Opstand!“ utdacht, proovt un op de Studiobühne opföhrt.
De Dialogen in dat Stück över den Opstand vun de Deerten op en Buernhoff tegen dat lege Regeer vun den Buern sünd all op Platt. De hebbt de jungen Schauspelers mit de Hölp vun Cornelia Ehlers un Hanna Müller sülvst tosomenstellt. Dormang gifft dat wat vigelienschere Texte op hoochdüütsch, de all mit dat Strieden för en beter Leven to doon hebbt. So kümmt to’n Bispill Johanna vun Orleans jüst so to Woort as twee ingelsche Striederschen för Fruunsrechten, en Spreker vun de IG Metall un en afghaansche Fru, de sik tegen dat unanstännige Anrögen vun en frömmen Keerl to Wehr sett hett. Dör dat Inbuen vun histoorsche Texten warrt de deepdenkern Siet vun dat Stück sünnerlich dütlich. De Opstand vun de Deerten fangt an mit en plattdüütsche Verschoon vun Martin Luther King sien beropen Reed „I have a dream“:
„Ik heff en Droom.“
„Ik heff en Droom, dat sik een Dag all de Deerten stark maakt.“
„Un dat leevt, wo an se glöövt.“
„För uns is de Wohrheit kloor!“
„All Deerten sünd gliek.“
„Ik heff en Droom!“
„Ik heff en Droom, dat een Dag op de grönen Bargen vun Buxthuud de Minschen un de Deerten as Bröder un Süstern ut den sülvigen Trog freten doot.“
„Ik heff en Droom!“
„Ik heff en Droom vun Wischen ut Freeheit un Gerechtigkeit.“
„Ik heff en Droom!“
„Ik heff en Droom, dat uns Kalvers, Farkens un Küken een Dag leven köönt, egaal, wat Minsch oder Deert.“
“Ik heff en Droom vundaag.”
Bannig gode Ideen steken ok in de Kostüme: Dat weern egens blots opsette Höörns, Ohren, en Snuut oder Snavel. Un een wüss op de Steed, wat för’n Deert dat weer.
De Kulisse weer eenfach en lange Bohn ut Packpoppier langs de achterste Wand mit en opmolten Tuun. Bi den Opstand reten de Deerten den Tuun rünner un molen op dat leddige Poppier dorachter ehr Welt: Wischen un Bööm in’e Sünn, en Möhl un en Lüchttorn un keen Tuun wiet un siet. As to’n Sluss de Hund Napoleon mit dat Swien wedder de Herrschop övernehm, wörr düsse Droomwelt wedder mit’n Tuun övermoolt. Noch so en Idee, as een mit wenig Opwand groten Indruck moken kann.
Meist all de Bewarvers harrn tominnst in’e School al mol op’e Bühne stahn. Ofschoonst ok anner Theoters Programme för junge Lüüd anbeden doot, sünd de mehrsten vun de jungen Lüüd jüst vunwegen jümehrn Vermook an de plattdüütsche Sprook an’t Ohnsorg komen. Een Deern ut Meiendörp vertell, se keem jo numol ut Hamborg un Platt höör sik so schöön no Heimat an. Wieldes een Deern ut Finkwarder al Platt kunn un en poor dat vun tohuus oder vun Oma un Opa kennen, harrn vele dor betto nix mit to doon. De weern eenfach neeschierig op de Sprook. De jungen Lüüd kemen vun heel verscheden hamborger Stadtdelen: Finkwarder, Barmbek, Neugraben, Billstedt, vun süden de Elv, ut de Binnenstadt, Lohbrügge, Meiendörp un Rahlstedt. Dat sünd man nich blots de Rebeten, woneem Plattdüütsch noch mehr begäng is. De mehrsten jungen Schauspelers müssen also eerst an de plattdüütsche Sprook ranföhrt warrn. För männicheen weer dat ok nich eenfach, Platt to lesen. Toeerst wull se dat jümmers ingelsch utsnacken, heff ik vun een höört. Man wieldes se dat Stück Pedd bi Pedd tosomenbuut hebbt, güng dat ok mit dat Plattdüütsch jümmers beter.
Proovt hebbt se eenmol in’e Week un in’e Pingstferien vör de Opföhrn denn jeedeen Dag. Dat weer en stuur Sook, man dat hett sik lohnt: Wokeen sik dat ankeken hett, kreeg en interessant un opregen Stück to sehn. De jungen Lüüd hebbt dat mit veel Insatz un Utdruck speelt. Un dat is nich opfullen, dat de mehrsten „egens“ gor keen Platt köönt. Gratulatschoon an all, de dor mitmookt hebbt!
Ok in düsse Speeltiet schall dat wedder en Ohnsorg Jugendclub geven. Poor Lüüd staht al op de Töövlist, de sik verleden Johr beten to loot meldt hebbt. Un de Schauspelers vun de verleden Speeltiet müchen op’t leevst ok wedder dorbi ween.
Vun Harten Dank an Cornelia Ehlers för de Informatschonen!
Wokeen mehr weten müch wennt sik an Tel. 040/35 08 03 50 oder ehlers@ohnsorg.de
Heft Artikel von: Kücklich, Petra