Heidrun Schlieker hett en nieget Book schreven: Snack, Snick un Botterlick – en Book, so steiht dat tominnst op den Ümslag, »för lütte un grote Lüüd«. Dree lütte Frünnen – en Grashüpper (»Snack«), en Snick (»Sneki-Snick«) un en Botterlicker (»Tjark Botterlick«) – maakt sik tosamen »op’t grote Aventüer«, op en Reis na Bollerbüttel, wo dat een Theater geven schall. Se maalt sik ok ut, wat se dor an Kunstwarken wiesen köönt: fiedeln (Snack), danzen (Tjark) und överkopp klattern (Snick).

Dat Problem is blots, dat de lüttje Sellschop dor gor nich ankummt, to’n Eersten wiel Snick nich so gau vorankümmt as de annern, un denn ok, wiel dat Bollerbüttel woll gor nich geven deit (jo, ik weet dat, ik heff bi google maps nakeken). Wat dat also vun Anfang an is, dat is en Reis in’t Land vun de Fantasie, en lüttjet Gedankenspeel. De Naam ›Bollerbüttel‹ lett een jo ok en beten an Astrid Lindgren ehr Büllerbü denken – man mit Lindgren un Büllerbü hett Bollerbüttel nich veel to doon. Al eher wat mit Waldemar Bonsels sien Biene Maja, dor warrt jo ok Insekten as Minschen darstellt. Bonsels beröhmten Grashüpper heet Flip. Man de Naam, den Heidrun Schlieker sik för ehrn Grashüpper utdacht hett, is ok nich slecht. Passt veel beter to Snick as Flip: Snack und Snick – dat is keen Snicksnack, dat is richtig goot!

Schlieker is keen Unbekannte mehr in’t Billerbook-Universum. 2007 is ehr eerstet plattdüütschet Kinnerbook Brummer Hinnerk un Spinn Hillegunn rutkamen un 2015 hett se den Lüttjepütt-Pries kregen. Snack, Snick un Botterlick is nu al ehr achtet Book un – ok dütmal wedder – hett se dat Book nich blots sülven schreven, se hett dat ok illustreert mit vele bunte, grote Biller, de aver – dat mutt een villicht anmarken – en beten to bunt worrn sünd (tominnst för mien Smack).

Dat Book hett op de rechte Siet jümmers de Biller un op de linke den Text. Af un an steiht dor blots een enkelten Satz, oder sogor blots en halven. De Schrift is so groot, dat een dat Book to Noot ok ohn Brill vörlesen kann. Un wenn een blots den Text lesen und de Biller gor nich ankieken will, duert dat nich mehr as dree Minuten, bet een mit de Geschicht dörch is. Man dat is jo nich de Idee. Schlieker will natürlich, dat sik de Lütten intensiv mit dat Book befaat. Se is vele Johrn Lehrersch an en Grundschool ween, ehr se 2006 in Rohstand gahn is. Dat weer to en Tiet, as Patttdüütsch in’e School noch nich so in Mood ween is as hüüttodaags.

Op de letzten dree Sieden vun’t Book gifft dat noch ganz wat Besünners: Dor sünd nämlich noch eenmal alle twintig Biller afdruckt, in ›lütt‹ – mit Woortverkloren för Lüüd, de noch nich so goot Platt snacken köönt. Dat gifft ok en Extra-Heft för Lehrers, mit männigeen Henwies op Hoch un Platt. Dor is ok en »entomologischer Sachtext« vun Katrin Habenicht afdruckt, den Johanna Kastendiek vun’n Quickborn översett hett. Een kann ok Arbeitssieden as pdf-Dateien rünnerladen vun Heidrun Schlieker ehr Homepage (hschlieker.de), ohn een Cent to betahlen. Dat hett se sik allens fein utdacht.

An besten gefullen hett mi övrigens dat letzte Bild, wo de dree lütten Krabbel-Frünnen snoorstracks op den Leser tofleegt, op den Rügg vun en »Luftbus-Jet« (en Libell), un al so dicht vör sien Nees sünd, dat he denken kann, se wullt glieks ut dat Book rutfleegen. An’n Enn wohrschoot Schlieker in besünners grote Bookstaven: »Pass op!! / Se sünd jüst achter di!« (S. 40). För Kinner vun 3 bet 7 Johren is dat Book seker en groten Spaaß, besünners wenn se sik de Biller tosamen mit grote Lüüd ankiekt un de Texten vörlest kriggt. Of dat aver ok wat för öllere Schoolkinner is, bün ik mi nich so seker, man ik bün jo ok nich so vele Johren in de Grundschool ween as Heidrun Schlieker. Se warrt dat woll weten!

Heidrun Schlieker: Snack, Snick un Botterlick oder De Reis na Bollerbüttel. En Billerbook op Plattdüütsch för lütte un grote Lüüd. Lüneburg: Plaggenhauer 2017. 44 Seiten, 30 x 21 cm, gebunden, ISBN 978–3–937949–21–5

Methodisch-didaktische Handreichungen. ISBN 978–3–937949–22–2

Spelen – Radeln – Malen – Klütern (Arbeitsmaterial). ISBN 978–3–937949–23–9

CD mit Bilderbuchkino, Insektenfotos und anderen Materialien. ISBN 978–3–937949–24–6

Heft Artikel von: Thomsen, Heiko