De Opföddern geiht an Kinner vun dree bet teihn Johr un an all, de geern singen doot. In de bunte Klapppappschachtel sünd twee CDs mit Kinnerleeder un Riemels un en dicket Heft, mit all de Texten. Gifft also keen Utreed, vun wegen weet den Text nich mehr. Den Text nich mehr weten, is en Anlass ween, de CDs to maken. Sünd de olen Leder. Dor finnt sik op CD 1, För de Lütten, eenfache Kinnerleder as Alle meine Entchen un Der Kuckuck und der Esel; Singspeele as Dei Plumssack geiht üm un Dåler, Dåler du möötst wannern; Spaßleder as Hört ihr die Regenwürmer husten un Auf der Mauer, auf der Lauer; Aftellriemels, Wesselgesang un Gedichte, so as Schaulkind vun Ursula Kurz. Vun de negenunveertig Stücken op de Schiev sünd veerteihn Plattdüütsch. Lütt Matten de Haas is jüst so dor as Dat du mien Leewsten büst.

Op CD 2, För de Groten, sünd dat ok veerteihn plattdüütsche Stücken, aver veerteihn ut negenundörtig. Geiht gliek los mit An de Eck steiht ′n Jung mit’n Tüdelband. Lütt Anna-Susanna is dor un Wenn hier en Pott mit Bohnen steiht, bet hen to Oewer de stillen Straten. In Hochdüütsch geiht dat vun Im Frühtau zu Berge, över Ein Lama in Yokohama, Horch was kommt von draußen rein bet Wer hat die Kokosnuss geklaut. Sünd ok twee Texte vun Ursula Kurz bi un een vun Hannelore Hinz.

Singen un de Musik maakt Schölers un Kinnergoornkinner. Ok de Biller op de Pappschachtel un in dat Begleitheft sünd vun Schoolkinner tekent. De Opgaav weer: singen Kinner. Is bunt un fröhlich.

As ik mi de Schieven anhört heff, füllen mi vele Texte wedder in. Goot, dat de Jung mit’n Tüdelband Meckelbörger is, mutt’n woll hennehmen, is dat doch en Meckelbörger Produkt. De Heimatverband Mecklenburg-Vorpommern e.V. hett holpen, dat Projekt to finanzeern, so dat de CDs an all Kinnergoorns un Grundscholen in Meckelbörg verdeelt warrn kunnen. Dat heet aver nich, dat dat blots wat för de Region is. De mehrsten Leder sünd in heel Norddüütschland bekannt un schullen nich vergeten warrn. De Hochdüütschen jüst so as de Plattdüütschen.

Eenzigst an dat Textheft heff ik wat to kritteln. So fehlt af un an de Afstänn (S. 21, 23, 25…), mal is dat toveel (S. 24), en Textreeg fehlt op S. 37 un op S. 53 steiht en Anmarken de dor nich henhöört. Wat man de Schrievwies å un œ bibeholen will, schull man öwer nadenken. Is en Meckelbörger Oort, de anners nich begäng is. Denn dat de CDs wat för den helen Norden sünd, dor bün ik mi seker.

Sing mit uns im Norden, alte und neue Kinderlieder und Reime in Hoch und auf Platt; Tennemann media GmbH,  Schwerin; Doppel CD mit allen Texte im Begleitheft; ISBN 978-3-941452-69-5

Heft Artikel von: Twenhöfel, Christl