Middewiel is dat meist en fasten Termin in mien Klenner worrn: De Sünnavend vör Dodensünndag, de Sünnavend, an den in Ollnborg in’e Kulturetage dat Finole vun den Plattsounds Bandcontest utdrogen warrt. De „Plattsounds Bandcontest“ is en Wettstriet för Musikers un Bands in’t Öller twüschen 15 un 30 Johrn ut Neddersassen. All Stücken mööt en plattdüütschen Text hebben.

Middewiel bün ik dat ok wennt, dat ik mi bi de Anreis ok mit „Navi“ op den dösigen Strotenkring verbiestern do. So weer dat ok verleden Johr an’n 23. November. Man ok düt Mol bün ik rechtiedig ankomen un dat hett sik wedder lohnt. Ik wörr meist seggen, dat warrt vun Johr to Johr beter.

De Reden vun de „niege“ Ministersch för Wetenschop un Kultur in Neddersassen, Dr. Gabriele Heinen-Kljajić, un den Baas vun de ollnburgsche Landschop so as dat Vörstelln vun de Jury weern fein kort. So stünnen de teihn jungen Bands un Musikers, de sik vun de 16, de bi den Wettstriet mitmookt hebbt,  för’t Finole qualifizeert harrn, an’e eerste Steed.

To’n Opwarmen spelen de „Schkandolmokers“, de in 2012 den tweten Pries kregen harrn, ehrn „Punk op Platt“. De Band hett in’t verleden Johr op en Reeg Veranstalten speelt, so ok bi’n Ollnborger Kultursommer un de Plattsounds-Bandnacht in Hamborg, un düsse Daag schall ehr eerste CD „Luud as Schiet“ rutkomen. Dat wiest, dat de Plattsounds Bandcontest ok för de Bands keen exotschen Utfloog is, man de Vermook an Plattdüütsch foken blifft.

Denn güng dat loos mit den Wettstriet. Un de harr wedder de verschedensten Oorden vun Musik to beden. Dor weern de beiden Jungs vun „Banana Roadkill“ ut Hannover, de ok 2012 al dorbi weern, mit jümehrn Song ut de Richt Alternative/Indie. Se bröchen wedder en Text mit bannig veel Phantasie mit. De vertell vun den Pechvagel „Johann“, de keen Arbeid harr, sik denn as Iesverköper versöch un ünner beten wat snaaksche Ümstänn dorbi to Dode komen is.

De Koppel Bbeatz ut Brunswiek is as Projekt vun de Brunswieker Landschop för moderne plattdüütsche Musik extra tosomenstellt worrn un hett ok al en CD „Wi sünd da“ opnohmen. In Ollnborg weern se mit jümehr Electro-Soul-Dance-Stück „Rock de Rogenmöhm“ dorbi. No dat Verkloren vun de Band is en Roggenmöhm en Spökelsch, de in’e Feller leevt. De lütten Kinner worrn wohrschaut: „Loop nich in’e Feller! Wohr di vör de Roggenmöhm!“

In dat Post-Hardcore-Stück „Biller un Öörd“ vun de Band „Halfway Decent“ ut Ossenbrügge güng dat üm Biller, de een in sien Gedanken hett. Man as dat bi de Oort Musik numol is, kunn een den Text, de för den Wettstriet ut‘t Ingelsche översett worrn is, meist gornich verstahn.

De Singer-Songwriter „Peter der Wolf“ ut Brunswiek weer al 2012 in’t Finole komen. Man he kunn denn nich optreden, wieldat he krank worrn weer. Nu harr he dat mit sien Leed „Winner“ wedder in’t Finole schafft. In sien Text geiht dat üm en Verlerer, wo de sik föhlen deit un üm den Gloven doran, dat ok he eenmol en Winner sien warrt. Dütmol hett dat jo noch nich slumpt. Man anhollen deit kriegen un all gode Dingen sünd dree. Denn kunn he ok mit dat Plattdüütsch noch mehr vertruut warrn. Männicheen Woort keem doch noch bannig hoochdüütsch röver. Man dat mag ok an de Opregen legen hebben un fallt bi en Singer-Songwriter kloor mehr op as bi en Punkrock-Band.

De DeutschRock- un Punk-Band Pyramit kümmt ut Emmen un Markus, de dat Slagtüüch speelt, kenn Plattdüütsch vun sien Grootöllern. Se vertellen, de Noom vun’e Band is ut „Pyramide“ un „Dynamit“ tohoopklütert un stünn för de Kraft, över sik sülven ruttowassen. Dat Stück „Vun Minsch to Minsch“ hannelt vun dat Utgrenzen vun Minschen, de anners sünd.

De Singer-Songwriter Ralf Meyer ut Auerk is mit Platt groot worrn un proot ok hüüt noch Platt. He harr den Text vun sien Leed „Alleen“ extra för den Plattsounds Bandcontest gau ut dat Ingelsche översett.

Ut Ollnborg keem de Funk-Rap-Band „Spinning Wheels“. Se weer as en Schoolprojekt tostann komen. De Schoolmeester för Musik speel den Bass. In dat Stück „Wo kann dat sien“ güng dat üm de legen Norichten as vun Krieg un Terror, de wi jeedeen Dag merrnmang Informatschonen över Promis, Sport un Wedder serveert kriegt, as weer dat normool. Dor müss ik doch bannig an dat Stück „An Tagen wie diesen“ vun de Band „Fettes Brot“ dinken. Man Text un Musik weern so goot, dat de „Spinning Wheels“ dormit de mehrsten Stimmen bi dat Afstimmen in’t Internet kregen un den Publikumspries wunnen hebbt.

Wieldes de Jury denn no de Kriterien Text, Musik un Optritt allgemeen de dree Winners utklamüstert hebbt, hebbt „De fofftig Penns“ bi’t Publikum för Stimmung sorgt. De köönt middewiel meist henkomen, woneem se wüllt, överall warrt se fiert. Man bi jümehrn plattdüütschen Elektro-HipHop fangt de Been ok meist vun sülven an, sik to rögen. Un de Refrains kann een foorts mitsingen.

Denn keem de opregen Momang: De Jury keem op de Bühn un vertell, wokeen de Priesen wunnen hett:

De drütte Pries güng an de Stonerrock-Band „Audiowolf“ ut Ollnborg för jümehr Stück „Millionär“. De Text vertell dorvun, dat Geld nich glücklich mookt un een sik Frünnen un Leev nich köpen kann. Man dat weer wedder en Oort Musik, bi de een vör de Bühn vun’n Text nich veel mitkriegen deit. Wo goot de Musik nu weer, doröver kann ik nich oordelen. Dat is eenfach nich mien Richt.

De Winners vun den tweten Pries harrn op jeedeen Fall al mol den besten Optritt: Twee Jungkeerls slepen en grode greune Tünn op de Bühn. Wokeen in’t Programmheft al den Noom vun de Band leest harr, kunn al vermoden ween, wo dat op rutlopen dä: De heet „Manninnetünn“, un so kladder ut de Tünn denn ok de drütte Mann vun düsse Koppel. De Dree studeert tohoop in Bremen. Se koomt ut Göttingen un Brunswiek un Jean-Oliver Groddeck, de dat Leed över den „Sünnünnergang“ schreven hett, is in Hamborg opwussen. Plattdüütsch hett he eerst laterhen an’e Volkshoochschool lehrt. He vertell – op Platt ! – de Idee för den Text weer em op Norderney komen. De Musikricht is Irish Folk mit Guitarr un twee Ukulelen un ok mol en Fleit twüschendrin. Dor warrt een glieks goot opleggt. Un bi dat Bild, an’e Noordsee op’n Diek to sitten un den Sünnünnergang to bekieken, mutt ik foorts an mien neegsten Urlaub dinken. Ok bi dat Afstimmen in’t Internet leeg düsse Bidrag wiet vörn.

Mit den eersten Pries hett de Jury de DeutschRock-Band „Lichtjahr“ ut Hannover för den Song „Achterbohn“ uttekent. Mit de hoochdüütsche Verschoon harr „Lichtjahr“ al den Contest „Musikrausch 5.0“ in Neddersassen wunnen. Dor worrn Leders söcht to dat Thema Missbruuk vun Alkohol. So vertellt de Text vun dat Leed ok dat Föhlen un Beleven vun en Deern oder Fru, de toveel Alkohol drunken hett. Dat is mit sien Op und Dol so intensiv un dicht vörstellt, dat een dat richtig tofaat kriggt. Dat dat ok op Platt allerbest funktschoneert, hett Thorsten Börnsen vun Plattsounds mit sien Översetten wiest. Vunwegen den Text stünn düsse Bidrag ok bi mi an eerste Steed. Dor warrt en eernstet Thema op meist poetsche Oort behannelt. Dat ji dorvun ok en Indruck kriegt, hebbt wi den Text hier afdruckt.

De fief Jungkeerls vun „Lichtjahr“ kunnen betto keen Plattdüütsch snacken un weern dor bloots in’ne School un in’n Urlaub beten mit in Kuntakt komen. De Veranstalters vun Plattsounds harrn de Band en Opnohm vun den plattdüütschen Text tostüert, dat se sik in de Utsprook inheuren kunnen. Ok sünst geev dat veel Loff för de Organisatschoon: Se weern jümmers goot informeert un noog betüdelt worrn. De Afslussveranstalten weer allerbest lopen un se harrn en Barg Spooß dorbi hatt.

För’t Vörjohr harr „Lichtjahr“ ok en egen CD ploont. Man as een nu op jümehr Internetsiet lesen kunn, gaht de Band as’t lett uteneen.

Man den Plattdüütschen Bandcontest Plattsounds schall dat, as ok de Ministersch Dr. Gabriele Heinen-Kljajić toseggt hett, ok 2014 wedder geven. Un ok en CD mit de Leders vun 2012 un 2013 wüllt se rutbringen. Männicheen harr villicht nich dacht, dat se mit Plattsounds so veel Spood hebben wörrn. Man as’t lett hebbt doch noch en Reeg junge Lüüd Vermook an Platt un Lust, sik in jümehr Musik dormit to befaten. Ik finn dat grootordig un hoop, dat düsse Erfolgsgeschicht noch heel lang wiedergeiht. Un wenn de Termin villicht ok noch nich nipp un nau faststeiht, warr ik mi den Sünnavend vör Dodensünndag al mol frieholen. Villicht krieg ik dat mit den Strotenkring jo düt Mol trecht.

Heft Artikel von: Kücklich, Petra