Twölf Schoolmeisterschen un Schoolmeisters weern komen to den Workshop, to den Cornelia Ehlers in de Ohnsorg-Studiobühne inloodt harr. Se wullen sik informeern över dat niege Stück „Leonce un Lena“ no Georg Büchner, dat op de Studiobühne vun’t Ohnsorg-Theoter op Hooch- un Plattdüütsch för junge Lüüd af 14 Johrn opföhrt warrn schull. Een keem ut Noordfreesland, een ut Barmstedt un de annern vun verscheden Hamborger Scholen. Vun de een oder anner School ok mehr as een, so as vun dat Gymnasium Ralstedt, dat ok Partnerschool vun’t Ohnsorg in’t TUSCH-Projekt (Theoter un School) is, oder ut Kirchwerder, wo de Schölers deelwies noch Platt snacken doot.
Wi seten in en Kring merrn op de Studiobühne op Kassens, de, deelwies al mit Kledoosch dekoreert, de Kulissen vun dat Stück weern oder warrn schullen.
Toeerst geev dat vun den Regesseur Ingo Putz bannig veel Interessantet över dat Stück to hören. He vertell vun de interessante Opgoov, düsse romantsche Kummedi, de an sik keen eenfachet Stück is, för junge Lüüd op de Bühne to bringen, un dat noch op Platt. Georg Büchner, de al in’t Öller vun 23 storven is, harr dat Stück för en Wettstriet schreven, man to loot afgeven. Dorwegen kunn dat keen Pries kriegen. Ingo Putz verkloor vele Parallelen to dat Stück „Dantons Tod“ vun densülvigen Schriever un richt dat Oog op Themen un Frogen, de in dat Stück binnen steken doot un mit de sik junge Lüüd ok hüdigendoogs noch befoten doot.
Leonce, de Prinz, deepdenkern ut Langewiel, schall de Prinzessin Lena heiroden, ofschoonst se enanner noch nienich to Gesicht kregen hebbt. Man he will överhaupt nich heiroden un al gor nich de Kroon vun sien Vadder övernehmen un regeern. Dat Nixdoon gefallt em op’t best, liekers he ok untofreden mit sik un sien Tostand is. Un Lena will nüms heiroden, den se nich leef hett un gor nich kennen deit. Dorwegen neiht se beid ut no Italien, woneem se sik denn drepen doot. Se weet beid nich, wokeen de anner is, man se verleeft sik in enanner un heiroodt denn verkleedt.
Blangen de Froog, wat un woso een heiroden schall, lött een dat Stück ok doröver nodenken, wat een sien Schicksol villicht al faststeiht, wat een överhaupt de Schangs hett, dorvun wegtokomen oder opletzt doch allens so kümmt, as dat schull: De beiden Königskinner kriegt sik opletzt doch, jüst as dat ploont weer un ofschoonst se sik wehrt hebbt. Dat is passlich för dat Öller, wo een anfangt notodenken: Woans will ik leven? Woso will ik dat?
Ingo Putz verkloor, wat för Gedanken he harr bi dat Ümsetten vun dat Stück för junge Lüüd, in Verbinnung mit de plattdüütsche Sprook un so, dat dat op de Studiobühne passen dä. Dorto keem noch, dat se dat Stück mit veer Schauspelers spelen wullen, ofschoonst dat Stück mehr Rullen hett. He hett denn in dat Stück noch en fürdere Schicht introcken. Dat sünd twee Hochtietsploner. De sünd ok en Poor un schüllt de königliche Hochtiet utrichten. Man dorto mööt se Prinz un Prinzessin eerstmol tohoopbringen. Düsse Hochtiedsploner schüllt twüschen Stück un Tokiekers vermiddeln. To de Tokiekers snackt se Hoochdüütsch man in ehr Rullen Platt. Düsse beiden Schauspelers speelt ok all de annern Rullen in dat Stück, so as König un Königin, Leonce sien Fründ Valerio, den Privootschoolmeister, Leonce sien Fründin Rosetta, Lena ehr Gouvernante un den Präsident. Se all snackt Platt. De Rullen wesselt se dör dat Anbacken vun Kleevzeddels, niemoodsch „Post-its“ nöömt, op de opsteiht, wat oder wokeen se grod sünd. Op düsse Oort warrt se twüschendör ok mol to en Deel vun’e Kulisse to’n Bispill as Buchsboom, Moos, Kamin, Bild oder Klock. De beiden annern Schauspelers speelt Leonce un Lena un snackt Hoochdüütsch.
In den tweten Deel vun den Workshop güng dat mehr üm de plattdüütsche Sprook. Cornelia Ehlers, de ok de Dramaturgie un de plattdüütschen Texten vun dat Stück mookt hett, harr wedder orrig wat an Materiol för de Schoolmeisters tohoopstellt. Dor geev dat to’n Bispill en Wöörlist un en Memoryspeel. In dat Memory sünd männich Wöör ut dat Stück eenmol op Platt un eenmol op Hoochdüütsch op Korten schreven. De Poorn schall een denn tonanner finnen. Dat hebbt wi denn ok glieks utprobeert. Een anner Opgoov weer, de Wöör dör Pantomime to wiesen, wieldess de annern denn rutfinnen schullen, wat meent weer. Denn wörrn an lütte Gruppen jümmers twee vun de schöönsten plattdüütschen Sätz ut dat Stück utdeelt un dorto schullen denn lütte Szenen speelt warrn. Dat allens hett veel Spooß mookt un weern gode Bispillen, wo een de Schölers för dat Stück rüsten un Vermook an Plattdüütsch wecken kann. Dorbi hett Cornelia Ehlers ok noch veel to de Sprook verkloort.
To’n Sluss dröffen wi denn noch en kotten Stremel vun en Proov ankieken un Frogen un Anmarken loswarrn.
Wi hebbt so en bannig goden Indruck vun dat Stück kregen. De Schoolmeisterschen un Schoolmeisters hebbt Tipps un Warktüüg mitnohmen, dat se jümehr Schölers hölpen köönt, dat Stück goot to verstohn. Ofschoonst ik nu keen Schoolmeistersch bün, heff ik veel Interessantet to weten kregen un frei mi, dat ik bi den Workshop dorbi ween dröff.
Heft Artikel von: Kücklich, Petra