„Dat Speel op Platt“ weer dat Motto vun de achteihnste plattdüütsche Bökermess, de de Carl-Toepfer-Stiftung an’n söbenten un achten November in’t Ohnsorg-Theoter utricht hett. Los güng dat as annerjohr ok an’n Sünnobend Klock ölven mit en Veranstalten in’n Theotersool. Dor worrn de Pries för dat plattdüütsche Book vun’t Johr an Marlou Lessing und Willi Höfig för „Dat grote Speel“ un de Karl-Mahncke-Theoterpries vergeven.

De Tieden weern dütmol beten anners. An’n Sünnobend kunn een op de Mess vun halvig ölben bet Klock söben Böker, CDs, Kalenner, Korten un annerswat ankieken un köpen. Den Plattdüütschen Gottesdeenst geev dat denn achteran Klock söben blangenan in’e Dreefaltigkeitskark St. Georg. An’n Sünndag weer de Bökermess vun Klock teihn bet Klock dree open. An’n Sünnobend geev dat in’t Ohnsorg keen Theotervörstellung. So weer dat dor nicht so bannig vull, man goot besöcht weer de Mess liekers. De Lüüd weern interesseert un een kunn männichmol heel goot in’t snacken komen.

Ok de Stänn weern dütmol beten anners opdeelt. Ünnen weern de grötteren Verlage as de Quickborn-Verlag, Wachholtz, Hinstorff un boben lüttere Verlage, Institutschonen un Vereene. Dor kunn een den Isenseeverlag finnen, Plattschapp, „Lütt Stina“ mit Korten, Magneten un Anstekers, Heidrun Schlieker, dat INS, „Dat Blatt op Platt“ – to’n letzten Mol – , den BS-Verlag ut Rostock un ok uns Quickborn-Vereen. Butendem weer Christianne Nölting dor mit Materiol to’n Plattdüütsch lehren un achtern weer en kommodige Eck mit Küssen, Kinnerböker un Spelen för den Plattsnackernowuss inricht. Man sovele Kinner heff ik op de Bökermess gor nich sehn – schood. Mehr för de jüngeren Besökers weer ok sachts de „Lesekrake“ dacht. De bestünn ut’n poor Släuch, de in’e Mitt verbunnen weern un anne Ennen en Trichter harrn. In den enen rin hett een wat vörleest un de annern kunn een sik an’t Ohr hollen un toluustern.

Op de Studiobühne hebbt ok wedder Schrievers ut jümehr niege Böker vörleest. Düsse Veranstalten hebbt männich Lüüd antrocken. Bi den een oder annern hebbt se noch Stöhl dortostellen müsst. Ik sülvst heff mi „Loriot op Platt“ vun de Nedderdüütsche Bühne Nordangeln ankeken un beleevt, dat sik Sketche as „Dat Fröhstücksei“ un „Fierobend“ ok allerbest op Platt spelen loot. Marianne Ehlers hett ehr Book „Snacks vun Küst un Binnenland“ vörstellt. Dorbinnen verkloort se Snacks, de een hier boben bemöten doot, so, dat ok en Tourist ut’n Söden vu’ne Republik jüm verstahn kann. Op Hoochdüütsch, klor, man allens beten plinköögsch un mit smucke buntklörige Comicbillers dorbi, de een to’n Smuustern bringt. Keen Book, dat en Plattsnacker nu hoochnödig bruken deit, man een, wo he – oder se, liekers sien Freid an hebben kann. Ümmerhen heff ik dorbi lehrt, wat en „Latiensche Köök“ is. Blots schood, dat dat Book nich rechtiedig fardig worrn is un wi dat nu eerst tokomen Johr köpen köönt.

To’n Afsluss geev dat Sünndag noch en Kunzeert vun Jan Cornelius. Un een müss sik wunnern, wo gau all de Stänn wedder verswunnen weern.

Petra Kücklich

Heft Artikel von: Kücklich, Petra