Endlich mol wedder en richtigen plattdüütschen Roman! 470 Sieden hett dat Book, en feinen Krimi, de een man so weglesen kann. Alleen för de Energie un de Kroosch, so en Projekt antogahn, verdeent Marlou Lessing Respekt. Dat is nu keen Krimi vun de hatte Oort, wo een Hartklabastern bi kriggt un nich mehr slopen kann. Un dat geev ok blots een Steed, mehr no’t Enn hen, wo ik dat Book jüst nich ut’e Hand leggen much. Man dat mookt liekers vun Anfang an Freid, dat Book to lesen. Een jumpt foorts rin in de Geschicht vun en junge Pastersch, de vun’e Stadt op’t Land komen is, un lehrt mit ehr dat Dörp mit all sien Lüüd kennen, de in dat Book en Rull spelen doot. Dat is veel mehr as en Krimi. Dat is ok en Dörpsroman. Marlou Lessing versteiht dat, mit starke passliche Wöör de enkelten Lüüd mit jümehr besünneren Charakter lebennig warrn to loten. So föhlt een sik gau tohuus in dat Dörp Wischenloh mang all de Dörpslüüd mit jümehr Nücken, wieldes de Geschicht sachten ut enkelte Fodens knütt warrt. Ok de Landschop warrt vör uns Ogen opmolt. An de een oder anner Steed is mi dat meist beten veel Landschop west. Al an den Titel kann een sehn, wat för een Begeevnis in den Krimi sachts en Rull spelen warrt. Man de Geschicht höllt en Reeg Överraschen praat, un so mookt dat Spooß, ok sien egen Gedanken af un an en niege Richt to geven. Mehr warrt ok nich verroden.

Dat Book büddt noch wat heel Besünners: Marlou Lessing hett sik de Möh mookt un en groot Deel vun de plattdüütschen Wöör an’n Rand direktemang blangen den Text verkloort. Wenn een in’t Plattdüütsche nich so seker is, bruukt he oder se blots no de Kant to kieken un finnt mit Schangs de Översetten. De Utwohl vun de översetten Wöör heff ik foken nich verstahn. Dat „Muurwark“ „Mauerwerk“ bedüüdt un „aventüürsch“ „abenteuerlich“ kann een sik jo meist sülvst denken. Man för dat veel bruukte Woort „Klint“ heff ik keen Översetten funnen. Ik bün twors nu nich jeedeen Siet dörgohn, man an de Steden, wo ik nokeken heff, weer keen. Liekers sünd dor männich Översetten, de wiss en grote Hölp ween köönt. Wat sik Plattanfängers mit düsse Hölp denn an so een lange Geschicht woogt, kann een blots höpen.

Marlou Lessing: Oosterfüer, verlag.marless.de, ISBN 978-3-9817194-1-3

Heft Artikel von: Kücklich, Petra