„De, de in de Minnerheit sünd, bewohren“ heet en Veranstalten, to de de
Linksfrakschoon vun’n Brannenborger Landdag na Potsdam inladen harr.
To düsse Podiumsdiskuschoon sünd an’n 23. Februar Gerrit Große un
Clemens Neumann vun de Linken un Astrid Flügge un Dr. Hinrich Enderlein
vun’n Vereen för Nedderdüütsch in Brannenborg tohoopkamen.
Dat schull dorüm gahn, wat Verene un Verbände tosamen mit Politik un
Verwalten för de Tokunft vun de Spraak doon köönt. Düütlich worrn is
dorbi, dat beide Sieden openanner anwiest sünd. Gerrit Große, MdL un
kulturpolitische Sprekersche vun de Linken, meen, dat Initiativen „vun
ünnen“ nödig deen, üm op de politische Ebene wat vörantobringen. Vele
Afordente vun’n Landdag würrn to wenig över dat Thema weten. Um
dat to ännern, schull de plattdüütsche „Basis“ jümmers wedder op sik
opmerksaam maken.
De Vertreders vun’n Vereen för Nedderdüütsch wiesen dorgegen op de
Projekten hen, de dat al gifft, to’n Bispill Platt för Kinner, Platt in de Kark
un Platt in de Pleeg. Se wünscht sik nu, dat se „vun baben“ mehr ünnerstütt
warrt. Dr. Enderlein vermoodt, dat de velen Ehrenamtlichen, de de
Projekten ümsett, frustreert warrt, wenn de Regeern nich wiest, dat se
achter de Plattdüütschen un jüm ehr Spraak steiht. Ook kritiseert he de
Passivität vun’t Bildungsministerium, wenn’t üm Plattdüütschünnerricht
an Scholen geiht. De Rahmenlehrplaan gifft de Scholen woll de Möglichkeit,
Ünnerricht in de Spraak antobeden, man se mööt dat nich doon un
warrt vun’t Ministerium dor ook nich to anholen. Schoolmeesters köönt
in Brannenborg ook keen Uutbillen orrer Zertifikaat för Plattünnerricht
maken. Große sä, dat de Scholen aver tominst Geld för Ünnerrichtsmateriaal
kriegen kunnen.
Op en allgemeen gröttere finanzielle Ünnerstütten kunnen de beiden
Politiker dorgegen keen Hoffen maken. Clemens Neumann, Referaatsvörstaher
in’t Kulturministerium, sä, dat de Pleeg vun de nedderdüütsche
Spraak noch ’n relativ nieges Vörhebben weer un dat dat dorüm
schwoor weer, dat mit‘n groten Posten in’n Huushoolt optonehmen.
Opstunns kriggt de Vereen för Nedderdüütsch 50.000 e in’t Johr vun’t
Land. Na en Anfraag uut dat Publikum hett Neumann aver ook anbaden,
mit de Verantwortlichen doröver to schnacken, wat he de „Zentralstell“
in Prenzlow ook noch ünner de Arms griepen kunn, de sik t. B.
üm’t Sammeln vun Literatuur uut de Uckermark sorgt.
In en anner Fraag vun de Tohörers güng dat üm den Kontakt un Uuttuusch
mit de annern Bunneslänner, in de Nedderdüütsch anerkannt is.
Düssen Kontakt gifft dat, man dat lett, as weer de nich sünnerlich intensiv.
Op de anner Siet kunnen sik de Plattdüütschen ook dat een un anner
vun de Sorben/Wenden in Brannenborg afkieken. Överhaupt würr dorop
henwiest, dat de Sorben sik mit de Plattdüütschen jümmers wedder
solidarisch wiesen un sik in verscheden Gremien för de nedderdüütsche
Spraak insetten würrn. En Rivalität geev dat nich, ook wenn’n as ungerecht
ansehn kunn, dat de Sorben veel mehr Geld vun’t Land kregen.
(Anm.: In 2016 överwiest Brannenborg 3 Mio. e an de Stiften för dat sorbische
Volk.)
Vöör de tokamen Maanden hebbt sik de Vertreders vun de Linken vörnahmen,
to mehr plattdüütsche Aktivitäten to vermünnern un sik üm
Platt in Kitas to kümmern. De Nedderdüütsch-Vereen warrt sik vörall op
en Kinnerkreativwettstriet un op Platt in Scholen konzentreren.
To Beginn un to’n Afsluss vun de Veranstalten geev dat noch ’n Vertelln
vun den Autor Dr. Jürgen Rogge to hören.
In’t Publikum seten dörtig bet veertig Tohörers uut Brannenborg, Meckelborg
un Berlin.
De Vereen för Nedderdüütsch in Brannenborg hett sik 2014 grünnt, mit
de Afsicht, de lokalen Initiativen in’t Land tosamentobringen un se ook
gegenöver de Politik to repräsenteren. Middewiel is he Deel vun en Arbeidsgruppp
Nedderdüütsch, in de he mit Vertreders vun de Regeern
eenmaal in’t Johr konkrete Projekten op den Weg bringen schall.
Heft Artikel von: Stoffers, Matthias