Nu is dat al Tradition, dat sik jeedeen Johr ünner dat Leit vun Cornelia Ehlers junge Lüüd twüschen veerteihn un achteihn in den Ohnsorg-Jugendclub en Theoterstück op Hooch- un Plattdüütsch utklamüstert un in’t Ohnsorg op de (Studio-)Bühn bringt. Düt Johr hebbt se sik de Geschicht vun Peter Pan as Vörbild nohmen un rutsuert is dor en heel nodenkern Stück över dat „erwachsen“ warrn, dat mi dör dat intensive Speel wedder orrig tofaat kregen hett.
Acht Deerns un dree Jungs staht op de Bühn. Männicheen heff ik al verleden Johr bi’n Ohnsorg-Jugendclub sehn. De Bühn is mit Sand utstreiht. Sünst gifft dat blots verscheden Stöhl. Mehr Kulisse bruukt dat nich.
Los geiht dat mit verscheden Gedanken, wat „erwachsen“ ween bedüdt: Freeheit un Verantwortung, sik sülvst funnen hebben, dor gifft dat keen Definition, een wasst doch sien Leven lang, de Problemen wasst mit, dat is nich an’t Öller bunnen …, de Verkloren: „Wi sünd de verloren Kinner. Wi wüllt nienich groot warrn. Wi köönt flegen, hebbt schöne Gedanken.“ un de Froog an’t Publikum, wokeen glöövt, dat he oder se al „erwachsen“ is. Dor hebbt sik nich vele mellt.
In dat Stück bemött uns vele Figuren, de eenfach nich groot warrn wullen un de jümehr Drööm leven wullen, so as Pippi Langstrumpf, Oskar Matzerath ut de „Blechtrommel“, klor de Personen ut „Peter Pan“, man ok Graf Dracula, Otto Lilienthal un Marlene Dietrich. Un dat geev ok en Utsnitt ut den plattdüütschen Sommernachtsdroom, de 2011 as eerstet Stück in’t niege Huus opföhrt worrn is. Blots weer dat dütmol Amor, de mit sien Pielen för Biesternis mang de Leevslüüd Lysander, Hermia, Helena un Demetrius sorgt hett.
So warrt dat groot warrn – oder nich groot warrn – vun heel verscheden Sieden bekeken. De jungen Schauspelers mookt in jümehr Rullen bannig Indruck un nehmt den Tokieker mit in de Handlung, wat sünnerlich goot dör de Neegde op de Studiobühn funktioneert.
Dat Stück geiht toenn mit den Song „Forever Young“ un de Insicht, dat wi all groot warrn mööt. Man wenn dat en Dör na’t Nimmerland geev, wörrst du dörgahn?
Schaad, dat de wunnerboren Stücken vun’n Ohnsorg-Jugendclub jümmers blots dreemol opföhrt warrt.
Nimmerland, Stückentwicklung des Ohnsorg-Jugendclubs, 03.07.2017
Heft Artikel von: Kücklich, Petra