De Schaap, de plattdüütsch snacken doot, sünd al wedder in en nee Aventüer mit Kater Fussel verwickelt. Hento keem nu ok noch Trine, de Heister.

De Opregen fung dormit an, dat de „Blomenkiekers“, de in dat Dörpsgemeenschoppshuus wahnen deen, to Besöök bi Jörg weren. Doch Jörg harr blots Ogen för de smucke Ulrike un nich mehr för de ole Schatztruh, in de doch en heel weertvullen Schatz binnen ween schull.

Bi Nacht un Nevel woor düsse Schatztruh vun twee Keerls klammliesen klaut.
Kater Fussel, de lütte Dedektiv, hett rutklamüüstert, woneem de Schatztruh nu stahn dee. De stunn nu in dat Dörpsgemeenschoppshuus, bi de „Blomenkiekers“. Wat wüllt de mit unsen Schatz un woans kriegt wi de Schatztruh nu wedder tuhuus op uns Deel? Doch nu gung de ganze Slamassel eerst richtig los.

En wunnerbor schreven Geschicht mit vele Teeknen in bunte Klören, schreven in Plattdüütsch. De keen Plattdüütsch lesen un verstahn köönt, steiht de Geschicht achtern in’t Book, so as ok in dat eerste Book „Mäh! Maa! Möh! Versteihst?“ vun Anke Ortlieb.

Mit düt Book hett se an dat eerste Book (Rezension Q4/2019 Siet 84) anslaten un de dree Schaap mit ehren ne’en Macker Kater Fussel in de Welt vun de Minschen ageren laten. Woans kaamt de nu ut den Kuddelmuddel wedder rut, dat lohnt sik to lesen un vörtolesen.

 

Anke Ortlieb: Mäh! Maa! Möh! – Un de oll Schatztruh,
Ribnitz-Damgarten: Demmler Verlag GmbH 2021,
Mit farbigen Zeichnungen von Anke Ortlieb, 47 Seiten.

ISBN 978-3-944102-43-6

Heft Artikel von: Frahm, Hannes