Wörüm wiest de Katt in’n Ringelpulli vörn op den Bookümslag uns ehren Rüch un Steert? Katten sünd doch bang un neeschierig togliek un wüllt doch toeerst allens sehn un klookkriegen, dach ik jümmers. Nu maakt mi düt Book aver neeschierig, un ik mutt rinkieken.

Man, de Katt, nipp un nau en Kater stellt sik ok vör mit „Ik“ un dorto en Bild. Un düsse Stuventiger „Ik“ vertellt nu, wat he mit sien Kattenogen allens süht un beleven deit, wat dat Alphadeert „Fru B.“ allens anners maken deit, as dat de Kater Liam dat geern harr. Dat geiht al los mit dat Freten. Dor fehlt de Afwesseln in dat, wat de Kater doch so geern mal freten much un Fru B. nich op’n Disch bringen deit. Water is je gresig natt, woans schasst dat nu drinken ahn natt to warrn? De Kater verkloort een ok, woto he Teppichen, Tüten un Papeer bruken mutt. Dat Tosamenleven mit de Minschen, mit anner Deerten warrt mit de Sicht ut de Kattenogen jüst so vertellt as dat Nachtleven, de Morgenstünn un de Liefwäsch. Un to’n Dank de Uttuusch vun Geschenken, aver Fru B., keen Plagiaten! Dat versteiht sik doch, oder?

Düsse philosophischen Gedanken vun den Kater Liam hett Jutta Bauer opschreven un Ulrike Stern hett de in plattdüütsche Leesstücken överdragen.

Mi hebbt de Geschichten bannig toseggt, ik mag Katten jüst so geen as Hunnen, aver nu seh ik de plattdüütschen Katten ut ehr egen Ogen, wenn ik se buten oder binnen sehn do. De Hypnoteseerkasten kann denn veelmals afstellt warrn, Kattenleven is veel interessanter, oder nich? Maakt sik sülven en Bild un leest.

Jutta Bauer: Kåter Liam, översett vun Ulrike Stern,
Ribnitz-Damgarten:  Demmler Verlag GmbH 2021

Mit farbigen Zeichnungen von Jutta Bauer. 53 Seiten.

ISBN 978-3-944102-39-9

Heft Artikel von: Frahm, Hannes