Plattdüütsche Vertellen vun güstern

 

Düsse CD weer de Johresgaav för de Maten vun de Quickborn Vereenigung för nedderdüütsche Spraak un Literatur e.V. Fief Lüüd vun de Redaktion, de sünst de Tietschrift Quickborn trecht maken doot, hebbt sik fief historische Schrieversminschen vörnahmen un enkelte Texten vun se utsöcht un sülvst för de CD leest. Karsten Böttcher ut Hamborg hett dat technisch akkerat in de Bibliothek vun de Carl-Toepfer-Stiften opnahmen un trecht sneden. De Quickborn-Verlag hett dat rutbröcht, un de Hamborger Behörde för Kultur hett Geld dorför geven. Worüm? Wieldat de Schrieverslüüd en Betog to Hamborg harrn? Dat sünd Texten, de een betto eher selten to hören kregen hett. De mehrsten sünd Vertellen, een Afdelen wiest den Lyriker Hermann Claudius, mag ween un vun siene söss Gedichten hier sünd enige den een oder annern bekannt. Allens goot antohören un deelwies to’n Smuustern..

En Booklet mit acht Sieden stellt de fief Schrieverslüüd kort vör. Dat maakt jümmers de, de op de CD den Text vörlesen deit. Wichtig: In düsse lütte Biografie gaht se ok dorup in, dat de een oder anner ok in de „brune Tiet“ schreven hett un wat dorvun to holen is.

De fief Lesers – dree Fruens un twee Mannslüüd – hebbt ehr Saak goot maakt, liekers se kene professionellen Sprekers sünd. Technisch sünd de Opnahmen allerbest.

Wat de Utwahl an Schrieverslüüd un Texten angeiht, so leest wi in’t Booklet: „Mit diesen Lesungen soll an zum Teil in Vergessenheit geratene plattdeutsche Autorinnen und Autoren erinnert werden.“ Dat is mi to wenig. Ja, hier höört wi wat vun Schrieverslüüd ut de nedderdüütsche Literaturgeschicht, de nich unwichtig weren. Un de Texten, de sünd nich platt un belanglos, aver ok olle Kamellen. Dorüm harr ik geern mehr to weten kregen: Worüm düsse Schrieverslüüd un nich annere? Worüm düsse Texten? Seker harr sik in’t Booklet noch Platz för en Verkloren vörweg finden laten.

Mitglieder der Quickborn Vereinigung lesen Geschichten und Erzählungen von zum Teil in Vergessenheit geratenen Autorinnen und Autoren, erinnert wird auf diese Weise an Hertha Borchert, Magreta Brandt, Hermann Claudius, Joachim Mähl und Wilfried Wroost. Ausgesucht und gelesen haben Christiane Batra, Bolko Bullerdiek, Johanna Kastendieck, Petra Kücklich und Heiko Thomsen.

Zwischenmusik: Bernd Harke (Komposition und Ausführung)

Quickborn Vereinigung (Hrsg.): Luuster mol torüch, Quickborn-Verlag, Hamburg 2020, ISBN 978-3-87651-465-9, 52 Min., CD, 5 Tracks

Heft Artikel von: Holm, Volker