Mit düsse Överschrift is en Informatschoon op Plattdüütsch un Hoochdüütsch bi mi in mien Nettbreefkasten opdükert. En Schrieven vun den Sleswig-Holsteenschen Heimatbund. Stütt warrt düt Schrieven vun vele noorddüütsche Heimatbünn un plattdüütschen Räten, un dat mit Recht as mi dücht.

To dat Schrieven höört en Video to, dat an de Naricht anbummelt weer. Un tohoop mit düt Video warrt dor en Schoh ut.

In dat Video warrt kloor un för all düütlich, dat de regionalen Spraken in uns Naverlänner ok in’t Radio na de EU-Charta för Minnerheitenspaak würdigt warrt, dat se dor vull respekteert warrt, dat de Spraken vulle Sennertieden vun en ganzen Dag hebbt, un nich as hier in Düütschland dat Plattdüütsche to Tieden brocht warrt, wo vun’t Radio op Feernsehn ümswitscht warrt.

• In Sweden hebbt 20 bet 40 Dusend Samen dagdääglich ehr Sameradio!
• 20 Dusend Swiezer hebbt dagdääglich ehr Räätromaansch in‘t Swiezer Radio RTR!
• 450 Dusend Nedderlänner köönt in’t Radio dagdääglich den helen Dag lang Freesch hören!
• För 750 Dusend Briten warrt dagdääglich Welsch op BBC utstrahlt!
• 1,6 Millionen Irlänner köönt dagdääglich Gäälsch op RTE luustern!

Un wi? Wat is mit uns 2,5 Millionen Plattdüütschen in Noorddüütschland?

Op den NDR as gröttsten „öffentlich rechtlichen Sender“ vun Noorddüütschland löppt Plattdüütsch in:

	Mekelnborg-Vörpommern	Neddersassen	Hamborg	Sleswig-Holsteen
Maandag bet Friedag		to Middagstiet 2 x 3 Minuten	vörmiddags poor Minuten, to Middagstiet 3 Minuten	vörmiddags 2 x 3 Minuten, avends af un an plattdüüt-sche Bidrääg
Sünnavend	een Stünn an’n Avend (Klock 7)	2 Stünnen an’n Avend (Klock 6 – 8)	vörmiddags 2 x poor Minuten	morgens 3 Minuten
Sünndag	3 Stünnen an’n Morgen (Klock 6 – 9)		morgens en halve Stünn (halvig negen)	Klock 10 – 2 enkelte plattdüütsche Bidrääg
anner Wekendaag	Friedagavend poor Minuten	Maandagavend een Stünn (Klock 7)		Maandagavend een Stünn (Klock 8)
all twee Weken	dat Nedderdüütsche Höörspeel in jede Kuntrei an‘n egen Wekendag, deelwies in’n Wessel mit de annern plattdüütschen Sennungen

Bi Radio Bremen Eins weren in’t Internett blots de Plattdüütschen Narichten Maandag bet Friedag halvig ölven to finnen.

Funklock in’t Radio? Ne, nich een Funklock, man dor sünd dusende vun Funklöcker in de beste Sennenstiet an jeden Dag to marken. De Intendanten mit ehr Managers meent sachts, dat de Plattdüütschen den helen Dag över an’t Slapen sünd. Anners kann dat doch gornich angahn, dat dat dor keen Tieden för plattdüütsche Bidrääg gifft.

Worüm geiht dat in de annern Naverslänner so goot, dat de för de Regionalspraken vun de staatlichen Rundfunksellschopen jeden Dag 24 Stunnen op de Regionalspraak op en egen Frequenz ehr Programm utstrahlen köönt?

In Noorddüütschland wahnt so bummelig 25 Millionen Minschen vun de 10%, also 2,5 Millionen, Plattsnackers und Hörers sünd. De betahlt ok ehr politisch fastsette GEZ-Geller, un dat nich blot för de „MEDIATHEEK“, wo de Plattdüütschen sik twüschenspiekerte Bidrääg mit „Wahlwedderhalen“ anhören köönt.

Is dat dat, wat de EU-Charta för Minnerheitenspraak utwiesen deit? Woneem sünd hier de Parteien un de Politikers un wiest de Intendanten an, för de Minnerheitenspraken mehr Sennertieden dagsöver antosetten? Worüm kann de NDR tosamen mit Radio-Bremen nich för dat hele Plattdüütsche Rebeet een Senner praatstellen? N-Platt to’n Bispeel!
Sünnavend mit dat Footballspeel ut dat Millerntor-Stadion vun St. Pauli gegen Hansa Rostock op Platt?
Oder Sünndag de Noorddüütsche Songcontest op Platt? Oder Rainer Sass, de NDR-Kock, verkloort, woans he Mehlbüdel mit Stipp maken deit, op Platt? Oder „Dat Kleverblatt“, en Vörstellen vun plattdüütsche Literatur vun veer Plattdüütsche merrnmang utstrahlt ut de Plattdüütsche Bibliothek in de Peterstraat in Hamborg?. Themen gifft dat noog.

Wokeen maakt dat Funklock dicht, wo blifft uns Plattform? Maakt wat!!

Heft Artikel von: Frahm, Hannes