De lesten Johren un jümmers to rechte Tiet vöör un för Wiehnachen hett Falko Weerts en Book mit Vertellen ruutbröcht, woll so üm un bi en lütt Dutz alltohoop mit de Johren un tomiehrst op Geel (Hoogdüütsch). Man nu vetellt he mool op Platt. Dat deit he eegens jümmers in sien Kolumnen op Platt in de Blääd vun de bremsche Kant. Un wat he dor schreeben hett, dat steiht ook achter sien Vertellen in düt nie’e Book.

Wat dor binn’ steiht, wiest di dat Inhaltsverzeichnis (S.[4]). Noh Weerts sien Wöör vöruut (S.7) vertellt he veerteihn Geschichten (S.8-57). Achteran stellt he sien Fotogrofens vöör: Birgit Schäffauer un Klaus Schulze (S.58), Martin Hermann, de för den Booksatz steiht (S.59) un sick sülm (S.60). Afsluuten wiest Falko noch op teihn vun sien öllere Beuker hen (S.61-70). Ganz achtern stickt noch dree loose Blääd mit en Barg Fotos vun Fomilje un Frünnen, tomiehrst ut de Advents- un Wiehnachstiet. Dat kümmt topass mit sien Widmung vöörweg: »Für meine Familie, Freunde und Interessierte«.

En poor Vertellen sünd beeten länger: »Een langen Weg to de Wahrheit« (S.16-25): Ludwig Treibel findt amenn sien wohre Mudder.

Oder: »Wenn een dat Hart breckt …« (S.26-32). Weerts sien Vertell-Ick kriggt dat Rodel mit de swatten Hooren bi de Vööröllern vun sien Fomilje ruut. Düsse Geschicht hett Weerts al mool vertellt: in sien Book Lebenslinien vun 2016, man dor op Geel.

De oole »Talk-op-Platt«-Minsch Falko Weerts is en flotten Verteller un künnigen Schrieversmann. Du kannst dat lütte Book an een’ Obend döörleesen un slöppst dor ni bi in. Ook wenn du bloots en »Interesseerten« büst.

Falko Weerts: Wat op Platt vertellt. Weerts-Verlag: Kirchweyhe 2020, 70 S.; zahlr. Farb-Abb. – ISBN: 978-3-940807-17-5.

Heft Artikel von: Diebner, Bernd Jörg