In’n Rohmen vun dat Hamborger Luther-Leesfestival Martinsdaag, dat de Evangelisch-lutherische Kark vun’e noorddüütschen Bunneslänner vun’n teihnten bet to’n veerteihnten November veranstalten dä, geev dat an’n 12.11. ok en Veranstalten in’t Ohnsorg-Theoter. „Luther op Platt“ heet de. Man op Platt weern meist blots de Texte, de vörleest worrn. De Moderatschoon un dat Snacken twüschendrin lepen gröttstendeels op Hoochdüütsch. Dat leeg dor an, dat en poor vun de Gäst op de Bühn so as de een Moderator Jon Fleming Olsen nich seker Platt snacken kunnen. Man villicht keem dat ok den een oder annern in’t Publikum topass. Dat Theoter weer tominnst in’t Parkett meist vull besett, ok wenn twüschendrin enkelte Plätzen frie bleven.

Vörweg hett uns vörmolige Schoolsenatersch Christa Goetsch en poor Wöör snackt un kloor mookt, wo wichtig Plattdüütsch is. Man mit den Twüschenroop, woso se denn nich Platt snacken dä, kunn se denn doch nich soveel anfangen. Blangen Jon Fleming Olsen hett de Ohnsorg-Schauspeelersch Sandra Keck de Moderation mookt. Dorbi hett se heel locker twüschen Platt un Hoochdüütsch wesselt. Op ehr lockere un hartliche Oort harr se dat ok wunnerbor alleen henkregen. Man Jon Fleming Olsen is en Noom, de de Lüüd antreckt.

Gäst op de Bühn weern de Schrievers Dörte Hansen, de bannig goot Platt snackt un leest hett, so as Petra Oelker un Frank Schulz, de jümehr plattdüütsche Texte ok fein vördregen kunnen. As „Schirmherrin“ vun de Veranstalten weer uns sympathsche Bischöpsche Kirsten Fehrs dor. Se snackt ok wunnerbor Platt un wi kregen to weten, dat ehr Mann op en Siedenstrang verwandt is mit den beropen plattdüütschen Schrieversmann Johann-Hinrich Fehrs. Op de kritischen Anmarken vun Ohnsorg-Schauspelersch Beate Kiupel, de sik orrig künnig mookt harr, is Kirsten Fehrs mit veel Verstahn un Künn ingahn. Denn weer noch Cord Wöhlke dor, de Baas vun Budnikowski. De harr op’t mehrst Maleschen mit dat Plattdüütsch un weer dat Vördregen sachts ok nich wennt.

To heuren kregen wi Texten ut de Bibel as Psalm 23, 90, 139 un 140 un dat „Hoogeleed vun’e Leev“ ut’n eersten Korintherbreef, allens op Platt un dat mook op de mehrsten nochmol mehr Indruck as de Hoochdüütschen Texten. Vun Psalm 23 geev dat ok noch en besünnere Version för Seelüüd. Luther sülvst hett sogor twee Texten op Platt schreven. Dat weern twee Breven an Karkenlüüd in Kiel. Dor hett Beate Kiupel wat vun vörleest. Denn geev dat noch Texte vun Johannes Bugenhagen, de mit de Reformation ok in Hamborg togang weer. Dat güng to’n Bispill üm de Armenkass, de Jungfruenschool un dat Johanneum, dat he in Hamborg inricht hett. Liekers de Texten üm un bi fiefhunnert Johr oolt weern, weer dor ok männichwat bin, wat ok hüütigendaags noch gellen deit.

För de Musik hebbt Gerrit Hoss mit Stücken vun sien CD „Platt!“ un Rolf Zuckowski mit scheune plattdüütsche Leders as „Wenn de Wind dreiht“, „Hüt is hüt“ un „Dat Obendleed“ sorgt.

Dat weer en heel besünnern, interessanten un kottwieligen Obend.

„Luther op Platt“, Ohnsorg-Theoter an’n 12.11.2015

Petra Kücklich

Heft Artikel von: Kücklich, Petra