Wiehnachten steiht vör de Döör. Ick wünsch uns all Tied ton
Lesen, ton Nadenken, ton Verhalen. De Quickborn bringt veel
Literatur – sünnerlich Geschichten för Mitdenker. Ick glööv,
dat wi ton ersten Maal wat von Arno Schmidt in uns Tiedschrift
afdruckt. Joost Hinrichs hett de „Die lange Grete“ behott in’t
Plattdüütsche överdragen un mi dücht, dat passt allerbest.
En von de jungen Autoren is Wilko Lücht. He hett dit Johr de
Freudenthal-Anerkennung kregen mit sien Geschicht „De Billerrahm“.
Barbara Scheuermann stüert dor ehr Gedanken as
Leserin to – wat aver nich meent, dat sick de Leser nich sien
eegen Gedanken maken schull.
En Wiehnachtsgeschicht vertellt Jutta Engbers – en Geschicht
över junge Lüüd, de unseker dat richtige Leven söökt, de dorto
hören wüllt, Fremde jüst so as Einheimische, un dat villicht
bi so wat „Uncooles“ as Wiehnachten finnt.
Haiku un Tanka glieks in dree Spraken hett uns Karin Molde
tostüert.
Von Heiko Gauert finnt wi en Geschicht över Minschen, de ut
Krieg un Elend to uns kaamt un hier Hölp un Fründlichkeit
söökt.
Dirk Römmer vertellt, wat dat „Book von’t Johr“ is un worüm
de Jury dat utsöcht hett. Man ok anners gifft dat noch en Reeg
Priesreden.
Natürlich gifft dat Rezensionen, denn in’n Harfst kaamt jo veel
Böker op den Markt. Uns Rezensenten hebbt sick as Vörköster
versöcht un vertellt, woans jem de Böker smeckt hebbt.
In de Rubrik „Ut’n Quickborn“ druckt wi en Inladen von 1910
to en Quickborn-Hög mit en lang Leed von Gorch Fock („Wi
singt dat na Schiller sien Riederleed“ – kennt een dat noch?)
Kortens hüngen bi mi in de Straat in krakelig-schöne Kinnerschrift
Inladen to en Utstellen von Monsterbiller. Ick weer dor,
heff ok en poor Biller köfft un luer dorop, dat Kjell Ringler en
grode Karriere maakt un mien Enkelkinner sick jichtenswen
höögt, dat ehr Opa wietsichtig in Kunst investeert hett. En poor
von disse Biller sünd in dit Heft to bewunnern.
In de Midd von dit Heft liggt en Översicht to „Plattdütsch
Land“. De köönt ji rutnehmen un in de Anthologie leggen.

Heft Artikel von: Bullerdiek, Bolko