Full House …
… is normolerwies ja gor keen plattdüütschet Woort,
höchstens so ’n lütt beten verwandt. Man wenn een’n so ‘n
„Full House“ hett, leeve plattdüütsche Frünn’n – bi ‘n Pokern
oder bi ‘n Würfelspeel – dennso hett dat wat to bedüüden!
„Full House“– dat sünd Fief in een Reeg – un dat is jümmer
wat heel Besünners. Mit so ‘n „Full House“ kannst du allerhand
Pluspunkte mit mooken. Szüh, un dat hett denn opmol
doch wat mit Plattdüütsch to doon – un sogor mit unsen
QUICKBORN! Wi hebbt düssen Sommer so ‘n „Full House“
op ‘e Hand – un schrievt uns de Punkte ook gliecks rin in
unsen QUICKBORN-Kniffel-Block!
Wo dat üm geiht? – Dat is doch klor: Dat geiht üm allerhand
Priese, de dat dütt Johr in Plattdüütschland geben hett. – Good,
ik geev dat to: Mit so ‘n beten Würfeln oder mit so ‘n vigelienschet
Kortenspeel bi Köm un Beer hebbt de plattdüütschen
Priesen nix to doon. Liekers hüürt ook dor ‘n Barg Glück mit
to, wenn du so ‘n wunnerboren Pries winnen deihst – un so
‘n Glück hett de QUICKBORN dütt Johr vörwiss hatt! Los
geiht dat natürlich mit den „Quickborn-Pries 2016“ för Dr. Dieter
Andresen. De Priesdräger is al lange Johrn Mitglied bi ‘n
QUICKBORN. Jüst so Hannelore Hinz: Se hett dütt Johr den
„Gillhoff-Pries“ kreegen. QUICKBORN-Mitglied Jürgen Kropp
ut Blickstedt un de „Fritz-Reuter-Pries 2016“ hüürt dor natürlich
ook mit to un bobento ook noch een’n, wo Christa Heise-
Batt vun vertellt. Un denn is dor natürlich ook noch Gerrit
Hoß. Düsse junge Sänger un Autor kriggt dütt Johr den „Bevensen-
Pries“ för plattdüütsche Musik. Gerrit Hoß is mit twee
Geschichten in dütt QUICKBORN-Heft binnen – un nu stell‘
ik mi natürlich vör, he dää noch dütt Johr ook noch Mitglied
waarn bi uns … also, dat wüür doch wohl wat! Dat wüürn
denn opmol Fief in een Reeg! Dat wüür – Full House!
De QUICKBORN jedenfalls graleert all Priesdrägers vun
Harten un segg vör alln Dank an all de, de mitmookt hebbt
bi dütt Heft! Nich bloots ut Norddüütschland komt düttmol
uns Texte un Autoren: Sogor ut Minnesota in Ameriko hebbt
wi een Bericht tostüürt kreegen. Sünnerlich henwiesen will
ik op een klooken Opsatz vun Ralph Busch, de dat Andinken
an Gorch Fock to ‘n Thema hett. Ik wünsch uns Lesers
veel Interesse un veel Vergnöögen an dütt Heft!
Heft Artikel von: Stelljes, Thomas