De Junius Verlag hett mit ’t Hamborger Avendblatt en Heft mit 32 Sieden
för lüttje Kinner rutbröcht. Wiebke Colmorgen hett den Text schreven
un Nele Palmtag hett Illustratschonen so as Kinnerbiller tostüert. Hummel
Hildegard is de Hauptfigur in ’e Geschicht. Se flüggt dör Hamborg –
vun ’e Alster na Planten un Blomen bet na ’n Michel, vun ’n Hamborger
Doom bet na ’n Haven un överall beleevt se so ’n beten wat. Dat sünd in
Hamborg de Plätz, de de lütten Kinner villicht al kennt un wo se sülvst
en Erinnern an hebbt. To all dat, wat de Hummel beleevt, gifft dat jümmer
en Text op Plattdüütsch un ok en op Hoochdüütsch. Nich Woort för Woort
översett, man vun ’n Sinn her. Dat is al schöön, doch heel wunnerbor is,
dat de Kinner anhoolt warrt, in dat Heft egen Ideen rintobringen un in
dat Heft sülvst Biller to malen – even en Mitmaal-Geschicht. Een Saak finn
ik aver nich goot: De Titel heet »Hummel Hilde« un in den Text warrt disse
Hummel meisttiets Hildegard nöömt. Seker, Hilde kummt vun Hildegard
un dat kann man de Kinner verkloren, dennoch harr ik ’t beter funnen, wenn
de Hummel ok in dat Heft blots Hilde nöömt worrn wöör. Sünst is dat en
goot Heft för uns lüttsten Lesers oder to ’n Vörlesen.
Wiebke Colmorgen, Nele Palmtag: Hummel Hilde, Eine Hamburger Mitmal-Geschichte op Platt un Hochdeutsch.
Hamburg: Junius Verlag GmbH, 2022, 32 S.;
ISBN 978-3-96060-552-2
Sonja Dohrmann
Heft Artikel von: Dohrmann, Sonja