Vundaag sünd sik Wetenschapslüüd enig, dat Kinner fröh mit en Reeg
Spraken in Kuntakt kamen schullen, denn so billt sik bi jüm in ’t Gehirn en
groot Spraakzentrum för all Spraken ut un disse Kinner lehrt nahst jede
Spraak lichter. De Methood, mit de de Kinner mit ne ’e Spraken bekannt
maakt warrt, nöömt sik »Immersion«, wat soveel bedüden deit as
»Induken«. Mit de Lütten warrt meistendeels in jümehr Standartspraak
snackt, man so nevenbi duukt se hier un dor in en annere Spraak in. Dat
kann Engelsch man ok Plattdüütsch oder en annere Spraak ween. De Kinner
lehrt nich de Grammatik oder de Schrievwies in ’e Theorie, sünnern
eenfach Wöör, Sätz, Sprüch un Riemels un se singt Leder in de ne’e
Spraak un höört Määrken, Gedichten un Vertellen. Man ok Ünnerrichtsfacken,
de nix mit Spraken to doon hebbt, künnt in de ne’e Spraak vermiddelt
warrn. To disse Methode hett dat en Projekt in Oostfreesland
un in’n Saterland vun de Osfrees’sche Landschaft tohoop mit dat Neddersassische
Kultusministerium geven. Se wullen kieken, wat dat dör fröhe
Mehrsprakigkeit Vördele in ’e Billen to sehn gifft. Un so hebbt se dor in
enige Grundscholen de Kinner in Mathematik, Musik, Religion, Sachünnerricht
un Sport op Plattdüütsch oder Saterfrees’sch ünnerricht. Un
süh an, keen Kind harr Problemen dormit, se wöörn all bi de Saak un
passen dull op. Ok in Sleswig-Holsteen gifft dat vele Kinnergoorns, de
neven Hoochdüütsch ok Anboten op Däänsch, Freesch un Plattdüütsch
maakt. Man ok in de annern noorddüütschen Bunnslänner warrt mit
Plattdüütsch de fröhe Mehrsprakigkeit angahn. De Bunnsraat för
Nedderdüütsch un dat Nedderdüütschsekretariat ünnerstütt genau
disse Oort vun Initiativen mit en Textsammeln t.B. för Mitarbeiter:sche
in Kitas, de sülvst blots wenig Platt snackt. Dat Heft »Snickermuus un
Spaddelkeerl« hett 56 Sieden un gifft Intresseerte Informatschonen un Material
för 10 Themen an ’e Hand:
Mit Plattdüütsch dör den Dag / Gedichten un Aftellriemels / Fingerspelen
/ Spelen un Snacken / Leder – Wi singt tosamen / Geschichten un Määrkens/ Kamishibai – Vertelltheater/ Spraakpoppen / Dör dat Johr / Buten spelen. Denn gifft dat noch en Barg  Wöör för den Kinnergoorn-Alldag un
vele Henwies op Böker un annert Material. »Snickemuus un Spaddelkeerl«
richt sik an Kitas un Erzieher:sche un ok an annere Intresseerten (villicht
Öllern oder Grootöllern), de Plattdüütsch wiedergeven wüllt. Dat Heft
köst nix un kann bestellt warrn bi:

Bundesraat för Nedderdüütsch & Niederdeutschsekretariat,
Heidi-Kabel-Platz 1, 20099 Hamburg, Tel.: 040 / 350803377
Info@niederdeutschsekretariat.de
www.niederdeutschsekretariat.de
Oder een kann dat Heft ut ’t Nett rünnerladen:
www.niederdeutschsekretariat.de/snickemuus-download

Dat lohnt allemal!
Sonja Dohrmann

Heft Artikel von: Dohrmann, Sonja