As ik mit dit Heft losleggt heff, do dach ik: Hier is’t nu also –
dat Sommerlock! Egens snackt man dorvun ja mehr bi de
Daagbläder, de jeden Dag frisch ut Politik, Weertschap
un Gesellschap berichten doot. Un midden in’n Sommer
kummt bi de denn oftens de grode Flaute, denn sünd nämlich
jichtenswann all in’n Urlaub. De Polikers, de Lüüd ut de
Weertschap un ok Künstlers oder Schauspelers un sülvst de
Bunnesliga fangt eerst langsam wedder an. Wat schall man
berichten? Doch de Kreativen bi disse Daagbläder weet sik
to hölpen, söökt lang un findt amenn wohrhaftig Minschen,
de mal wedder Nessie, dat »Ungeheuer von Loch Ness«, oder
en Ufo oder sünst wat för’n Tüddelkram sehn hebbt. Un dat
mutt ja op jeden Fall in’e Welt bröcht warrn!
Goot, wi sünd en Tietschrift för plattdüütsche Spraak un Literatur,
de all dree Maanden druckt warrt, dor sünd wi nich
op dat Aktuelle anwiest. Man dennoch mööt wi Texten finnen
oder tostüert kriegen. Un dat lööp dit Mal nich so flott an
as sünst. Ik harr al Angst, blots 30 Sieden vulltokriegen. Man
denn güng dat los. De Literatur-Texten flattern op eenmal
in mien digitaalet Postfach. De hannelt vun Football – passt
goot, wo wi in’n Juli de Football-EM vun’e Froonslüüd hatt
hebbt –, vun den groden Steen an’e Elv, vun Lengen un Snurkers
un vun Moord bi Ehlüüd, vun dat unheemlich Warken
dör en Urgrootmudder, vun Krieg un – ach, un noch vun
eenige annere Themen. Mi is en ganz besünnern Bericht över
de Klaus-Groth-Tagung tostüerst worrn un noch annere Berichten
vun Veranstalten, wo Plattdüütsch in’n Fokus ween
is oder man blots an’n Rand vörkamen is. Ünner Fundsaken
findt sik Biller ut den Marschen-Kalenner vun Fritz Lau vun
1922 un en Bericht över en groot Oornfest in Neddersassen.
Denn hebbt wi Rezensionen ünner annern to’n Krimi un to
Kinnerböker un ok wedder wat för de Lütten un natürlich ok
vele Narichten. Uns Heft is twoors blots in Swattwitt druckt,
man de Texten sünd kunterbunt! Ik meen, för jeedeen is woll
wat dorbi. Dat Sommerlock gifft also doch nich un Nessie
kann in Schottland blieven!

Veel Spaaß bi’t Stövern, Kieken un Lesen.

Sonja Dohrmann

Heft Artikel von: Dohrmann, Sonja