Jan Ladiges hett’n Nomen in de plattdütsche Poetry-Slam Szene.

Ja, so wat gifft dat nu al ’n Tied lang: een plattdüütsch Poetry-Slam Szene. Un ik glööv so gau is keen literarsche Mood ut anner Sproken in de plattdüütsche Sprook opnohmen worrn, nich de expressionistisch Lyrik, nich de short-story un al gor nich de Krimi.

Man ik mutt ja togeven, dat Slammen, dat hett wat: een kann allens ünner de Lüüd bringen, ernst oder to’n Lachen, Poesie oder Prosa, kümmt blots op an, wat’n dat Publikum mitnehmen deiht in de Welt vun sien Geschicht. Kümmt op an, wat dat dat Publikum gefallt.

Un dat kriggt de Dichter nu glieks to weten, mutt nich eerst op de Stimm vun’n Kritiker töven – wenn he denn öberhaupt’n Verlag finnen deiht, de sien Wark druckt, dat een Kritiker dat öberhaupt in de Fingers kriegen kann!

Nee, dat Publikum seggt heel direkt, wat dat heurn (oder lesen) will un wat nich. Un Jan Ladiges wüllt se heurn. De Gaarner ut Holm (Kreis Pinneberg) hett al so männigeen Slam wunnen in de veer oder fiev Johr, de he nu bi is bi’t Dichten, hett sogor 2016 den Kulturpries in Holm kregen.

Ik heff em ook al sehn un he hett Indruck mookt op mi. Sien Optreden is heel slicht. Mit Pokerface un drögen Humor vertellt he, wo he de Welt süht, wonehm de Haken sitt in den Alldag oder wat he de groot Politik gern mol in’t Stammbook schrieven much.

Sien Texten sünd kabarettistisch. He bringt jem in Versen, rapt sien Texten männigmol, fangt langsom un liesen an, ward gauer un luder un hett to’n Slutt jümmers noch eenen in’n Sinn, öberrascht de Lüüd mit sien Pointe. Un de ganze Tied speelt he nich blots mit den Inhalt man ook mit de Sprook, mookt Schüttelreime, ritt Wöör ut den Tosomenhang un boot se nee tohoop.

An’t Enn vun 2016 hett Jan Ladiges nu sien tweet CD rutbröcht. „Gegenströömsch“ heet se. Un gegen den Streek börst sünd sien Texten meisttieds. De erste CD, Rap-Snuten, keem al 2014 rut. De Jan Ladiges nu nich blots af un an op de Bühn beleben mag un sik sien Versen in de Stuuv holen will, de kann bi em de CD bestellen ünner ladiges-jan@gmx.de

Blots een Sook gefallt mi an den CD-Slam to Huus ganz un gor nich: ik kann sien Pokerface un sien Körpersprook nich sehn. Un dat heurt nu mol egens ook bi den Slam dorto, jüst so as de Reaktschon ut dat Publikum. Man een kann eben nich allens hebben….

Jan Ladiges: Gegenströömsch, CD, aufgenommen von Juni bis November 2016 im downstairs-studio

Heft Artikel von: Straumer, Ingrid