Se snackt oder proot nich, se kört. De fief Musikers vun de plattdüütsche Folk-Rock-Band „Wippsteert“ koomt ut Thiene bi Ossenbrügge. An jümehr Platt mutt sik een ut Hamborg eerst wennen. Man een heurt sik dor gau rin un denn hett dat sien besünnern Charme. De Lidmoten vun de Band hebbt al fröher Musik mookt. Dorbi lang de Richt vun Funk över Alternativrock bet Metal. Eerst 2014 hebbt se besloten, as „Wippsteert“ tohoop plattdüütschen Folk-Rock to moken. In kotte Tiet hebbt se denn dat Album „Folkplattcore“ mit negen bannig feine plattdüütsche Songs tohoopklütert un in’t Vörjohr 2015 de CD opnohmen. De Songs hebbt allens, wat een sik vun goden Folk-Rock wünschen kann. Inspireert vun Folk ut Irland un Ameriko kiekt se ok in all Ecken vun’e Rockmusik vörbi un peppt de Musik vun Gitarre, Bass un Slagtüüch mit Banjo, Mandoline, Mundörgeln un Trompete op. Man ok op de Texten lohnt sik dat to luustern. De eerste Song op de CD is „Wecke de nich doch“ un passt to den plattdüütschen Snack „Do wat du wullt, de Lüüd snackt doch“. In düsset Stück snackt de Lüüd över een, de beten anners utsüht un veel to lude Musik mookt. Man villicht sünd se jo man ok blots beten afgünstig, dat he sik düsse Frieheit günnt. De Refrain „Bis du nich düsse wecke, wecke de nich doch? Du bis doch düsse wecke, de bis du doch?“ let toeerst as’n Tungenbreker, man wenn een den eerstmol mitsingen kann, warrt dat foorts to’n Ohrwurm. De Song „Düsse Disk“ is en Tweesprook mit den olen Disch över dat, wat de allens beleevt hett. Op de Idee mutt een eerstmol komen. In „Dör di dör“ geiht dat üm de Strohlen vun’e Handys, mit de wi meist ohn Nodenken jeedeen Dag ümgoht. „Use Tiet“ vertellt vun twee, de sik funnen hebbt blots vunwegen de Stimm an’t Telefon. „Kötter äs me ment“ vermahnt, ut sien Leven wat to moken, to’n Bispill kann een jo mol „Aff inne Sünne“ fohren. In en anner Leed singt se över de scheune „Maitiet“ un in „Wat dann kummp“ stellt sik de Band sülvst vör. För all, de de Texten geern mol nolesen wüllt, sünd de in en lütt Heft afdruckt. Dat steekt tohoop mit de CD in en ümweltfründliche Papphüll. Wokeen nu al neeschierig worrn is, finnt de Texten un Heurbispelen op de Internetsiet vun de Band http://www.wippsteert-band.de . Dor kann een sik ok de CD bestellen. No mien Menen is de plattdüütsche Musiklandschop dör Wippsteert en godet Stück rieker worrn. Un keen Folk-Rock mag, den kann ik de CD blots anraden. Huusarbeid geiht dormit dubbelt so gau vun’e Hand un mit betere Luun, heff ik probeert. Luustert doch mol rin!
Wippsteert, Folkplattcore, to kriegen ünner http://www.wippsteert-band.de/wippsteert-laden.html för 10,- €
Heft Artikel von: Kücklich, Petra