Dat is mol heel wat anners, as een sünst in’n groten Sool vun’t Ohnsorg to sehn kriggt, man passt doch heel goot dorhen: No den Kinofilm „Soul Kitchen“ vun Fatih Akin un Adam Bousdoukos, en Leevsverkloren an Hamborg, hett Regisseur Ingo Putz, de al „Leonce un Lena“ op de Studiobühn bröcht hett, en Theoterstück för’t Ohnsorg-Theoter schreven, dat Cornelia Ehlers in’t Plattdüütsche bröcht hett.
Nodem de Stütt vör Kulturbedrieven vun de Stadt streken wöör, is dat Ohnsorg-Theoter in’t Düütsche Schauspeelhuus ümtrocken. In’t „ole“ Ohnsorg in’t Bieberhaus hett Sino en Kneipe opmookt, man dat löppt nich so richtig. To eten gifft’t Kantüffelsolot ut Plastikammers un verscheden Oorten Fleesch in Schü. Nich blots, dat he Probleme mit’t Finanzamt kriggt un sien Rüch em piert, hett Sino ok noch Sorgen in’e Leev, wieldat sien Fründin no Shanghai treckt, un mit sien Broder Linus, de blots Utgang vun’t Kaschott kriggt, wenn he en Arbeid nowiesen kann, klor in’t „Soul Kitchen“. Man mit en niegen Gourmet-Kook, de Soken as „Den Düvel sien Klöten“ op de Spieskoort schrifft, un de Soul-Band, de dor öven will, warrt dat Soul-Kitchen to’n Szene-Lokol. Liekers fehlt em sien Fründin un so will Sino no Shanghai. Dat Soul-Kitchen blifft in’e Hannen vun Broder Linus, de dat bi’t Kortenspeel an en Immobilienmakler verleert. Man se geevt dat noch nich heel un deel verloren.
En besünnern Andeel an den Swung vun dat Stück hett dat grootordige Speel vun de gröttstendeels jüngeren Schauspelers. Toeerst müch ik dor Holger Dexne nömen. Wi kunnen em al op de Studiobühn in „Leonce un Lena“ un „Goot gegen Noordwind“ beleven. He speelt den Sino as en leeftalligen Chaoten, den een sien Maleschen afnimmt, man de een ok jümmers wedder smuustern lett. Denn is dor de Barfru Luzie, de op ehr spröde Oort man mit’t Hart an’e rechte Steed den Loden an’t lopen höllt. En richtige Type man mit en weke Siet, allerbest darstellt vun Kristina Bremer. De weer al in „Fett Swien“ un toletzt as wunnerbor överdreihte Schantall in „Wenn de Katt ut’n Huus is“ to sehn. Tim Ehlert as Sleev Linus hett in „Landeier – Buer söcht Fro“ mitspeelt. Horst Arenthold bringt as Meder un Stammgast Sokrates mit sien Leed „Ik wünsch mi en lütt Huus an’n Elbestrand“ en beten wat vun’t „ole“ Ohnsorg in dat Stück. Tobias Kilian speelt den Immobilienhai Neumann, de dat op dat Soul-Kitchen afsehn hett. Neumann snackt so as sien Fründin un de Lüüd vun’t Finanzamt Hoochdüütsch wieldess al annern Platt snackt. Kilian hett al in „Fett Swien“ dat Ekel geven. He övertreckt dat so, dat een dor al wedder över grienen kann. Den Sternekook mit’n Barg Nücken speelt Oskar Ketelhut heel grootordig. Denn gifft dat noch echten Soul vun Love Newkirk un Band.
Wat op de Bühn noch allens passeert un wo dat op’t letzt utgeiht, dat kiekt jo op’t best sülvst an. De Schangs dorför gifft vun 9. bet 17. Juli un 7. bet 11. September 2016 un vun 11. bet 16. Februar un 4. bet 7. Mai 2017. Ik meen, dat lohnt sik, un warr mi dat förwiss noch en twetet Mol ankieken. Dat Stück is ok to de Hamborger Privottheoterdoog inloodt worrn un warrt an’n 1. Juli in’t Altnoer Theoter opföhrt. Un dat schood nix, wenn een den Film nich kennt.
Soul Kitchen op Platt, no den Film vun Fatih Akin & Adam Bousdoukos, Plattdüütsch vun Cornelia Ehlers, Fassung vun Ingo Putz, Ohnsorg-Theater 19.03.2016
Heft Artikel von: Kücklich, Petra