Ook för 2019 gifft dat em wedder, den „Plattdüütschen Kalenner“ ut de Edition Fehrs-Gilde. Moie Biller ut Norddütschland. Steiht bi, woneem Beate Zoellner dat upnohmen hett, Sylt, Nordstrand, Schenefeld orer Hamborg to´n Bispill. Dor is Nevel, Sünn achter Bööm, Wulken, spegeln in´t Woter, gülden Loov, wat Land un Johrstieden uns allns schenken doot. Marianne Ehlers hett to jedeen Bild een Gedicht schreven, up Platt, is je kloor. Jedeen Maand een Gedicht, jümmer twölf Regen, un noch een „Över dat Johr“, dat up de Achtersied steiht. Dor sünd ook all de Biller in lütt to sehn, so is dat je begäng.

Dat Kalendarium is groot noog, dat ´n ook mol ´n Notiz henschrieven kann. De Doog sünd up platt utschreven, ook de Fierdoog. Door heet dat denn Stillfreedag, Oostern orer  De Sommer fangt an. Över den Donnersdag  kunn man woll noch mol snacken. Januar un Februar ober sünd keen Platt, hett door de „Autokorrektur“ tosloon? Bi de annern Maand is dat je keen Ünnerscheed to´t Hochdütsche. Ook de Bildünnerschriften sünd Hochdütsch. Müss dat door nich tominnst op Plattdütsch bi stohn?

Man ook wenn ik wat to kriddeln heff, de Kalenner hett sien´n Noomen verdeent.

Edition Fehrs-Gilde(Hrsg.), De Plattdüütsche Kalenner 2019, Wachholtz Murmann Publishers, Monatskalender, 14 Seiten, 33×33 cm, ISBN 978-3-529-04872-2

Heft Artikel von: Twenhöfel, Christl