In´t Internet heff ik söcht na plattdütsche Kalenner. Door keem denn ook de „Voß un Haas“ togangen. Dat dat em all ewige Tieden geben deit, heff ik weten, man ik heff em noch ni nich in de Hannen hat. Dat is nu anners. Dat handliche Book liggt bi mi up´n Schrievdisch. Is veel to lesen in, dat hett Dirk Römmer all in Heft 2/2018, S. 69/70 künnig mookt. Sünd Texten in Hoch un Platt, Prosa un Lyrik. Mutt  ik nich allns noch mol vertelln.

In´n Ünnertitel heet dat „Norddeutscher Heimatkalender“. Wat is door Kalenner an, heff ik mi froogt. Up Siet veer is en Johrsöversicht, eenfach, ahn Biwark. Siet söss is överschreven mit „Januar 2019 Hartmand“. Vun´n eersten bet eenundörtigsten steiht achter jedeen Dag en Johrstall, en Noom un Ort, Krüüz orer Steern.  Dat geiht so bet Sied 28 „Dezember 2019 Christmand“, jede linke Booksiet een Maand.

In den Afschnitt Literarisches find sik denn dat Johr wedder, von Niejohr bet Wiehnachtsmärken. Grönkohl, Oostern, Snicken, för jedeen Johrstied is door wat bi. Mi ward nich jedeen Maand orer Week en Geschicht todeelt, as ik mi dat vörstellt har. Dat is en Book, dat ik dat heele Johr jümmer mol wedder to Hand nehmen schall, wat för de Johrstied rutsöken un lesen.

 

Hartmut Brun (Hrsg.), Voß un Haas, Norddeutscher Heimatkalender 2019, 112 Seiten, Hinstorff Verlag, ISBN 978-3-356-02189-9

Heft Artikel von: Twenhöfel, Christl