Disse Rezension mutt ik opdelen un twoors in een för de CD un een för dat Book, wat dor mit bi höört (oder anners rum?).

Also toeerst de CD.

Nu is se endlich dor,  de tweete överarbeit Oplaag vun Jan Cornelius Kinner-CD „Kandidel“. Dor hebbt al so veel Lüüd op töövt. Hett ok meist 25 Johren duert, bet dat Book mit de CD nu wedder to kopen is.
De Opnahmen hett Ballou (Gerd Brandt) vun ARTychoke maakt un ok en poor vun de Billerin de Book maalt. Rutkamen is dat Book to de CD bi‘n Plaggenhauer Verlag. Dat Överarbeiten vun de Noten hett Gerold Meinen övernahmen.
De mehrsten Texte sünd vun Jan Cornelius, un,  wat ik goot finn, he hett ok en poor Gedichten vun de heel bekannte oostfreesche Autorin Greta Schoon vertont. De Leder sünd kinnergerecht komponeert, wat nich heet, dat se in blots dree Akkorden schreven sünd. Dat sünd Melodien, de in’t Ohr gaht un de Refrains vun de Kinner glieks mitsungen warrn köönt. Mal sünd se rockig, bluesig, in’n „Country-style“ oder as en Shanty schreven. Bi en poor vun de Leder hett Jan Cornelius sik Kinner haalt, de in wunnerschöön Oostfreesenplatt ehr Strophen singt.  Sünnerlich goot gefullen hett mi dat Leed vun de Kinnerland-Piraten, wo de Fantasie vun de Kinner anreegt ward. Bi „Derenraadselleed“ köönt sik de Kinner noch sülvst Strophen dorto utdenken un mit dat „Dagenleed“ köönt se heel fix de Wekendagen lehren, liekso bi dat „Klörenleed“. To vele Leder köönt se sik bewegen un danzen. Anregungen gifft dat in dat Book dorto.

Nu to dat Book:

Översichtlich un kloor opdeelt in verscheden Kategorien. Dor gifft dat Leder ünner „Kaugummi maakt mi Spaß“, „Waar de eerste Maleevke bleiht“, “Körte Dagen, lange Nachten“ un „Puusterkes in d‘ Wind“.  To elkeen Leed gifft dat den Text un de Noten. Un dorünner  staht korte Översetten vun enkelte Wöör un Henwiesen, wat to dat Leed maakt warrn kann. Dat is goot för Kinnergoornkinner un villicht ok noch för de 1. un 2. Schoolklass.

Wat mi nich so goot gefullen hett, is dat Book sülvst. Nicht de Inhalt, man wo dat „tosamenschustert“ is. Ik heff dat en poor Mal in de Hannen hatt un nu al fallen mi de ersten Bläder in de Mööt. Dat Book is heel slecht bunnen un/oder kleevt. Ik stell  mi vör, wenn Kinner dat in de Hannen hebbt, üm de Biller antokieken, denn sünd dat bald blots noch flegen Bläder.

Dat Ümslagbild is würklich „kandidel“ mit en Scheep vull Derten un en Pogg, de Banjo speelt.
En heel gelungen Bispeel, wo een wat un mit Kinner doon kann.
Danke, Jan Cornelius!

Jan Cornelius: Kandidel, Book un CD, Plaggenhauer Verlag, Wilschenbrucher Weg 77, 21335 Lüneburg, ISBN 978-3-937949-28-4

Heft Artikel von: Kastendieck, Johanna