Ik bün 1961 in Karktimk (Kirchtimke) in Neddersassen op de Welt kamen un mit twee Swestern un twee Bröder opwussen. Mien Vadder wöör Timmermann un mien Mudder harr mit uns Kinner noog um de Ohren, as dat se noch en annere Arbeit maken kunn. Mien eerste Spraak wöör Plattdüütsch – tohuus, mit de Verwandten, mit Frünnen un mit meist all de Lüüd in't Dörp. As ik na School kööm, müss ik Hoochdüütsch lehren. Man dat klapp ganz goot. As Kind heff ik al lüttje Geschichten schreven un de Bläder mit Nodel un Foden tosamenneiht, villicht wiel dat mien Oma en Neihersche wöör – mag ween. Op jeden Fall müch ik do al Böker geern. Later heff ik in Hamborg studeert un dorna lange Johren in Willemsborg an en Beroopsschool as Schoolmeestersche arbeidt. Mi maakt Schrieven veel Spaaß un de een oder annere vun mien Vertellen op Hooch- oder Plattdüütsch hett den Weg in en Book oder Tietschrift funnen. 2017 bün ik to’n Quickborn kamen un arbeid hier ehrenamtlich un mit grote Freid mit. Geiht ja wedder üm't Schrieven.