1965 bün ik in Hamborg op'e Welt komen un hier ok opwussen. Mien Vadder hett mi mit Riemels as „Lütt Matten de Haas“ al beten Plattdüütsch in’t Ohr sett. In mien Ferien bi Oma in Basbek (hüüt Hemmoor) heff ik dat ok to heuren kregen. Man eerst mit över veertig heff ik den Dreih kregen un wull dat ok richtig snacken lehren. 2009 heff ik mi dorför denn bi de Volkshoochschool anmellt. Bi een Kurs is dat natürlich nich bleven un Platt is för mi gau heel wichtig worrn. Dör de Plattdüütschkurse heff ik ok Spooß an’t Schrieven funnen. Siet 2011 bün ik nu bi'n Quickborn dorbi.