Ik heet hüüt Ingrid Straumer un leev al siet 1980 in Berlin. Man ik bün 1952 as Ingrid Ahrens in Hamborg-Allermoi op de Welt komen. Wi wahnen mit de Grootöllern tohoop un dor wöör veel Platt in de Fomilie un in de Noberschop snackt. Mit uns Kinner snacken de Lüüd meist Hoch. Ik bün negen Johr op de Volksschool west un heff dor bi Günter Harte in’n Düütschünnerricht ook plattdüütsche Literatur kennenlehrt. De hett mi nich mehr losloten. No dat Abitur, dat ik op Ümwegen noholt heff, heff ik denn blangen Pädagogik in de Hauptsook Germanistik studeert. Mien Rebeet weer Platt. Ik heff dat bi Prof. Dr. Möhn un Prof. Dr. Meier studeert. In de Tied, an’n Anfang vun de 70iger Johr, heff ik ook al anfungen, för den Quickborn to schrieben. Siet 93 bün ik fast in de Redaktschon. Ook heff ik vun 73 an bi de Bämsen-Dagfohrten mitmookt. Dor bün ik nu siet een Johr Vörsittersch. Vun 1997 an schriev ik jeden Sünnobend een lütt plattdütsche Kolumne för de „Bergedorfer Zeitung“. Bi dit Blatt heff ik no mien Utbillung as Lehrersch ook noch een Volontariat mookt un bün Redakteurin worrn. Man nu geiht dat op de Rente to un denn is viellicht wedder mehr Tied för Platt.