Ick bün 1939 in Tansania op de Welt kamen. Denn keem de Krieg un de Englänner hebbt erst mienen Vadder insparrt un later uns all verdreven. Wi sünd in en Dörp an’n Rand von de Wersermasch lannt. Mien Vadder is denn Soldat worrn un in’n Krieg in Nordafrika verblött. Uns Mudder hett mienen Broder un mi as Neihersch dörbrocht. In mien Böker heet dat Dörp Bökenbarg, op de Landkoort Bookholzberg. Mien Verwandte weern meist Handwarker. Man wat för’n Handwark schall een lehrn, de twee linke Hannen hett? So bün ick Industriekoopmann worrn, heff aver de Langewiel op de Duer nich utholen. Bün denn in Ollnborg wedder to School gahn, heff dor Abitur maakt, in Hamborg studeert un bün dor as Schoolmester bleven. De meiste Tied heff ick in dat Landesinstitut für Lehrerbildung und Schulentwicklung arbeidt. Plattdüütsch is de Spraak von mien Mudder, man nich mien Mudderspraak. Mien Mudder hett mit ehr Süstern un Bröder Platt snackt, nich mit ehr Jungs. Ick harr de Spraak jümmer in’t Ohr, man nich op mien Tung – bit ick mi dorüm kümmert heff. Man wenn ick nu trüchgah in dat Dörp von mien Kinnertied, wunnert sick de Lüüd, dat dor en Hamborger kummt, de Platt snacken will. Mien Böker heff ick toeerst bi Hinstorff veröffentlicht, later in den Quickborn-Verlag. Middewiel heff ick en poor Priesen kregen: 1993 Freudenthal-Pries, 1995 Fritz-Reuter-Pries von de Alfred-Toepfer-Stiftung, 2000 den ersten, 2010 den fofften, 2014 den drütten Pries bi den Vertell-doch-mal-Wettbewarv von’n NDR, 2016 den Borsla-Pries. Siet vele Johrn arbeit ick mit an de Quickborn-Tiedschrift. Bolko Bullerdiek in:

• Niederdeutsche Wikipedia
• PBuB
• Quickborn-Verlag
• Zentrum für Niederdeutsch (Ratzeburg)