Rechtiedig to’t Enn vun’e Sommertiet hett de plattdüütsche Pop-Koppel „Die Tüdelband“ ut Hamborg ehr niege CD rutbröcht un an’n 25.10. mit en fein Kunzeert in’t KNUST in Hamborg vörstellt. „Sommerkinner“ heet de CD un würklich kann de Titelsong een dat hööglich lichte Sommergeföhl för’n Tiet trüchbringen, dat een dat „Lüttje Glück“ – as een anner Song heten deit – spöört. Denn gifft dat noch en driest emanzipeerten Song vun dat, wat de Singersch op ehr Reisen mit verscheden Keerls beleevt, liekers ehr Piet tohuus töven deit. Kann een meist beten leed doon, de Keerl. Man dor sünd ok noch wat liesere Stücken mang de 13 Leders op de CD, mit eernsthaftige un deelwies poetische Texte, de een anrögen doot un över de een lang nodinken kann. De mag ik besünners geern, so to’n Bispill „Ik un Du“, de dat nich geven kann, denn „se“ is jümmers dorbi, oder dat Leed vun verscheden Wegen dör’t „Levenslabyrinth“. In „Klockwark“ geiht dat üm en Partner, de blots an’t Wekenenn nohuus kümmt. Överhaupt geiht dat in de Texten foken üm dat Miteenanner vun twee Minschen un meist sünd se an een „Du“ richt, wat den Hörer sünnerlich anspreken deit. Jüst de lieseren un de eernsthaftigeren Leder dücht mi hier wat weker un rieper as betherto. Sünnerlich schöön is dat Leed „Stieg in“, as en Droom oder Märken vun all de lütten Deerten op grote Reis, de Stimmung vun de Musik wunnerbor utdrückt. Vull Phantasie stickt ok dat Leed „Vulle Fohrt vörut“, an een Book schreven. Een niege „Hamborg-Hymne“ gifft dat ok, dor weer de Singersch „Lever in Hamborg“, denn dor sleit dat Hart jichtenswo rohiger.
An enkelte Steden dücht mi de plattdüütsche Text beten neeg an den hoochdüütschen, de in dat lütte Heft bi de CD jümmers blangen den plattdüütschen steiht. Dor dä ik mi op Platt männichmol anners utdrücken. Man dor schüllt ji beter sülvst över ordelen. No mien Menen lohnt sik dat förwiss, in düsse CD mol rintohören. Dat sünd interessante Texte mit en gode Musik vull Afwesseln, de sik ok geern mol in’t Ohr fastsetten deit. – In mien Ohren de beste CD, de „Die Tüdelband“ betherto rutbröcht hett. De blifft noch en Stoot in mien CD-Speler binnen.
Die Tüdelband. CD „Sommerkinner“. To kriegen bi www.plattschapp.de
Heft Artikel von: Kücklich, Petra