Siet den 27. September köönt wi se nu köpen, de eerste CD vun de plattdüütschen Elektro-HipHopper „De fofftig Penns“. Ankünnigt weer se jo al lang. Man en goot Ding bruukt sien Tiet. Un goot is’e worrn, de CD „Dialektro“ mit all de plattdüütschen Elektro-HipHop-Stücken op, de de Lüüd al op de Kunzeerten vun „De fofftig Penns“ orrig ingang bröcht hebbt.
Un dat weer grod de rechte Tiet. Jüst nodem „De fofftig Penns“ bi den „Bundesvision Songcontest“ in’t Kiekschapp mang de sössteihn Bunnslänner den söbenten Platz mookt hebbt. Dat is för’n plattdüütschen Bidrag bannig goot. Nich blots vun‘e noorddüütschen Navers hebbt de Jungs ut Bremen Noord orrig Punkte kregen. Ok ut de annern Bunnslänner weern mehrsttieds en poor Punkten dorbi.
In en groot Internett-Koophuus hett de CD in de mehrsten Bewerten vun’e Köpers glieks fief vun fief Steerns kregen.
No deepdenkern Texten bruukt een op de CD nich to söken. Dat geiht mehrsttiets üm de Jungs ehr Levensgeföhl, Spooß hebben, de Musik un den Erfolg, mit den se gor nich rekent harrn. Ümmerhen sünd se mit ehr Musik bet no Japan komen.
Liekers lohnt sik dat, in dat lütte Heft mit de Texten rintokieken, dat bi de CD dorbi is. Toeerst warrt een de Teelgrupp wies: För de lütten Bookstaven bruukt een junge Ogen. Man mit’n gode Brill geiht dat nödigenfalls ok.
Dat sünd witzige Texte vull plietsche Ideen, de eenfach Spooß moken doot. Se wiest, wo goot Platt ok för’n modernen Alldag to bruken is. Kloor gaht de Jungs dorbi nich pimpelig mit de Sprook üm. So slickt sik as in’t Hoochdüütsche männich ingelsch Woort in. Af un an warrt dat in’e Schrievwies „platt mookt“ as in „De Biet“. Oder dor suert denn so scheune „plattdengelsche“ Wöör bi ruut as „Plietschphone“, wat ik jo teihnmol beter finn as „Ackersnacker“. Un bi dat Verstohn vun den Text vun dat Leed „Dialektro“ hett mi weniger dat Plattdüütschwöörbook holpen as de Internettsieden över Jöögd- un Rappersprook. Dor heff ik al wedder wat tolehrt. Keen weet, wo een dat nochmol bruken kann?
Dorbi wüllt „De fofftig Penns“ kene „Plattdüütsch-Redder“ ween. Dat seggt se ok in jümehr Texten. Se mookt dat eenfach, wieldat dat Spooß mookt. Un dat mookt dat ok bi’t Hören un heel sünnerlich bi de Kunzeerten. Man jüst düsse glückte Bewies, dat junge Lüüd mit Platt eenfach bannig Spooß hebben köönt, döcht villicht beter, Vermook an Platt to wecken as männicheen kloket Programm.
Tominnst sünd „De fofftig Penns“ nu heel bekannt. Sogor de Vertreder vun’e Schoolbehöörd hett se in sien Reed bi de Plattdüütsche Bookmess nöömt. Villicht warrt se dor jo sogor mol för’t musikoolsche Rahmenprogramm inloodt. Denn „live“ sünd se numol op’t best. Wokeen sik dorvun övertügen müch, kann dat to’n Bispill in’n Aprilmoond op een vun de Kunzeerten in verscheden Städten doon. Wat joon Stadt dorbi is un de enkelten Termine finnt ji op de Internett-Siet vun de Band http://www.defofftigpenns.de/ ünner „LIVE“. Bi‘t Opropen vun de Siet kriegt een ok glieks dat Video to den Titelsong „Dialektro“ to sehn.
CD „Dialektro“ vun „De fofftig Penns“ bi Welcome Home Music / Groove Attack
Heft Artikel von: Kücklich, Petra