Thorsten Börnsen hett Geschicht studeert. He weet, vun wat he snacken deit. Un dat deit he op Platt so locker un lebennig, dat een männichmol menen kunn, een is sülvst dorbi west. Faken tövert een sien Vertellen vun de Tiet, as se dat Raathuus buut hebbt, wat dunntomool begäng weer un wat för Sorgen un Denkwies de olen Senaters harrn, ok en lütt Smustergrienen in’t Gesicht.
Dorbi warrt een meist gor nich wies, dat een blangenbi ok noch’n Stremel Geschicht bipuult kriggt. Un all de Afsünnerlichkeiten vun düt staatsche Buwark warrt op’t best verkloort.
Wokeen sik also den „Comic Strip“ vun’t Leven vun den ideolen Hamburger ankieken müch, oder wokeen al jümmers weten wull, woso dat Raathuus vun een Stadtrepublik en Kaisersool bruukt, woso in’n Festsool nicht danzt warrn dröfft, woso du in’e Börgerschap ok mool blangen een to sitten kümmst, de di nich na de Mütz is, woso de Bischop en leddige Steed segen deit, woso een in de Waisenstuuv egolweg beluert warrt, woveel de Senaters dunntomool to drägen harrn, woveel de Lüüd al to düsse Tiet vun „corporate identity“ verstunnen un woför dat goot is, dat dat Gollen Book gor keen Book is – den kann ik düssen Törn dörch’t Hamborger Raathuus blots vun Harten anraden.
Dat allens un bannig wat mehr warrt op den Törn vertellt. Un dat mit een Humor, den dat blots op Platt gifft, un den ik so frisch un sympathsch betto bi nüms anners beleevt heff.
Den Raathuustörn gifft dat jümmers an‘n tweten Sünndag in’n Maand üm Klock dree. Kosten deit dat dree Euro un anmellen schall een sik ünner 040/428 31 – 3405.
Anmarken 2018: middewiel köst dat al fief Euro un de Nummer för’t Anmellen is 040/428 31 – 2064
Heft Artikel von: Kücklich, Petra