Se hebbt em dat Huus wegnahmen: „Zwangsversteigerung“. Sien Öllernhuus! Uwe Hinrichsen kann dat nich verstahn. Dat he mit siene Suup-Schulden sik dat inbrockt hett, dor will he nix vun weten. Un as nu in „sien“ leddig Huus de asylsöken Flüchtlingen inquarteert ward, geiht em so gegen den Strich, dat he een Ladung Gülle vör dat Huus un över dat Huus utsprütt. Fru Lautenschläger, de ut Berlin anreist is, üm dat Integrations-Projekt hier in Nedderhöörn in Gang to setten, will al hensmieten un bloots noch weg, wieldat se wegen düsse Rotzigkeit ok noch to Schaden kamen is. Avers er Amt röppt ehr nich wedder trüch, för een Johr is se in dat Dörp fastnogelt, wo noch Platt snackt ward. Un wieldat Nedderhöörn för düsse Opgaav 200.000 Euro toschreven kriggt, is dat för Börgermeister Dietmar Holthagen de letzte Chance, sien Dörp vör den Ruin to bewohrn. De Saak mutt klappen!
Uwe Hinrichsen kriggt dat nu nich mit de Polizei to doon un he landt ok nich vör Gericht, nee, üm sien Gülle-Verbreken good to maken, mutt he nu den Düütsch-Ünnerricht för de Flüchtlingsgrupp in „sien“ ool Huus övernehmen. Un nu fangt de Komedie an. Nee, se is al lang in Gang, un jedereen kann hier sien komödiantisch Talent vull utspelen, de Tschetschenin mit schreehalsig Bockigkeit, de superblonde Asiatin mit ehr opdringlich Selfie-Fotographie, de Nigerianer mit mitrieten rhythmisch Körperspraak nah de Oostseewellen-Melodie. Un de Syrer schafft mit Krabbenpulen un Buddelschipp-Bastelee dat Hart vun den griesgrämig muffigen Uwe Hinrichsen ümtostimmen un speelt sik ok gliek in de Harten vun dat Ohnsorg-Publikum. Un de Düütsch-Ünnerricht – nee, de Plattdüütsch-Ünnerricht – kann losgahn un kümmt richtig in Schwung.
Man wat dor bi rutkümmt, steiht op een anner Blatt: De Schöler fallt dör bi de Prüfung. De Dozentin fraagt bloots Hoochdüütsch af. Nedderhöörns Integrations-Kurs weer de totale Flop. De Börgermeister is blameert bit op de Knaken, Hinrichsen mit sien Platt hett den Ruin bröcht. Ut un vörbi. Wirklich ut un vörbi? Dor weer doch noch wat? Jo, dor is noch wat, dor is de „Europäisch Charta för Regional- un Minderheiten-Spraken“ – sied 1. 1. 1999 steiht Plattdüütsch ünner een besünner Schutz un mutt bi de Ämter un ok in de School anerkannt warrn. De Prüferin ward trüchhoolt, un – all’ns löppt good ut: Plattdüütsch is hier de Padd to de Integration. Un noch wat: De Syrer hett Hinrichsen dat Buddelschipp klaut un achter den sien Rügg nah een Wettbewerb henstüü’rt. Un dat Schipp hett nich bloots den eersten Pries maakt, nee, dat bringt ok 150 Bestellungen in. In Nedderhöörn gifft dat op eenmal wedder Arbeid: De Flüchtlingen mit ehr ünnerscheedlich Begaven un Temperamenten sünd een Segen för dütt afschreven Dörp op dat platte Land.
Wi verdankt den Autor Sönke Andresen een Stück ut dat noorddütsche Theater-Deepland (Ostfriesisch für Anfänger). He hett twee aktuelle Themen opgrepen: dat Ut-Öden vun vele Dörper op dat Land (Thema bi dat Plattd. Pastoral-Kolleeg in Loccum 2017) un de Flüchtlings-Fraag. Un he hett ok noch de „Europäisch Charta“ in’t Speel bröcht, de twoors dor is, avers för de Plattsnacker un all de Medien egens (noch) keen Rull speelt. Un denn hett he ut düsse Buu-Stenen een’n wunnerboren Mix ut Eernsthaftigkeit un humoorvull Komedie maakt un de Speler so veel lustgeven Rullen toschreven, dat ok dat Tokieken de reine Lust is. Ik wünsch mi, dat Andresen bi dat Mundoort-Theater blifft un uns noch mennig een Öberraschen bescheert, dat wi nich ümmer op annerlands Lustspelen trüchgriepen mööt un de öbersetten. – Wenn dat doch wiederhen bekannt weer, wo good dat is, Sied an Sied mit so’ne Flüchtlingen nah Mööglichkeiten to söken, dat Tosomenleven Sinn un Form to geven, denn weer dat leidige Sülbst-Mitleid blangen uns lang nich so larmig. Andresen sien Stück maakt Moot op Willkommens-Kultur. Un – bedenkt doch: De Flüchtlinge sünd in een Minderheits-Situation – de plattdüütsche Spraak is dat ok! Plattdüütsch Lüüd kunnen egens veel Verständnis opbringen för Minschen, de de Weltgeschicht an den Rand schoben hett. Dank ok an Murat Yeginer, de dat Stück opgrepen un ümsett hett, he weet jo wol, wo dat üm geiht!
Wer mitspeelt hett: Frank Grupe as de missgünstig Witwer Uwe Hinrichsen (Glanzrull!). – Stefan Leonard as Bürgermeister, de all’ns versöcht. – Beate Kiupel as Pastorin, een hartensgood Fredensengel, de avers nich verhinnern kann, dat ut ehr „Fest der Toleranz“ een Massenschlägeree ward. – Sandra Keck in een Dubbelrull, as Prüferin empöört över de Spraak-Kenntnissen vun de Hinrichsen-Schöler. – Ulrich Bähnk as Kneipenkröger Fiete stramm gegen Utländer. – Meike Meiners as Projektleiterin Vera Lautenschläger ünner Kulturschock, avers se findt sik in ehr Schicksal, wieldat de Börgermeister ehr to Föten liggt. – Orhan Müstak as de Syrer, Abdullelah Hemedi; sien Tosomenspeel mit Frank Gruppe is de Glanzpunkt vun dat Stück. – Boubacar Dieme as Nigerianer, Sammy Aman, bringt afrikaansch Farv un Schwung mit. – Yvonne Yung Hee Bormann as de blonde Asiatin, Eun Mi, mutt alle nääslang een Foto maken. – Karina Rudi as de düüster kieken Tschetschenin, Svetlana Dudajew is so integrations-unwillig, dat se een Füüer in de Köök leggt.
Ohnsorg- Premiere 7. Januar 2018
Heft Artikel von: Denker, Cord