In disse Tied

En CD vull moderne Musik vun Balladen bet Pop un allens op Platt. Dat is de CD PLATT!, de de junge hamburger Musiker Gerrit Hoss jüst rutbröcht hett. Wi kennt sien Stimm ut mennigeen plattdüütsche Reportaasch bi’n NDR un ok sien Songs „Nix mehr to verleren“ und „In disse Tied“, de ok op de CD op sünd, weern dor al to hören. All Musik un Texten hett he sülvst schreven mit een Utnohm: En Verschoon vun dat Leed „Dat du mien Leevsten büst“ finnt sik op de CD ok. Bi sien egen Songs is em de Balance twüschen de ingängig Musik un de foken beten nodenkern Texten bannig goot glückt. De Texten sünd al bi’t Hören goot to verstahn man bi de CD is ok en lütt Heft bi, wo een de nolesen kann. In de Texten geiht dat foken üm dat Nodenken över dat Leven, sik sülms un Frünnen. Wokeen bün ik? Wat föhl ik? Wat will ik? Wo seh ik de Welt?

In „Nix mehr to verleren“ geiht dat üm dat Verarbeiden vun en Trennung. Wehmödig stimmt ok de Geschicht vun „Dat olle Klavier“, dat mennigeen Schicksal beleevt hett un nu nich mehr bruukt warrt. „Blots in mien Gedanken“ beschrifft en dörmookte swore Tiet. Man dat is as bi vele Stücken op de CD nich heel un deel dütlich man mehr poetisch utdrückt un lett veel Ruum vör egen Gedanken. Man de CD mookt ok Moot notodenken, wat di wichtig is, denn dat is „Lang nich to laat“, wat to ännern. Denn „Dat gifft so veel, wat sik lohnt mit anner Ogen to sehn. Wat du so lang söchst liggt achter’n neegsten Steen“ as dat in den Song „Ik kann dat Meer sehn“ heet. In „Nüms“ geiht dat üm all dat Gräsige op de Welt un welkeen Andeel een villicht sülvst doran hett. Ok in „Wat weer wenn“ geiht dat üm Nodenken över dat Leven. Man de „Sommerregen“ spöölt de düüstern Gedanken weg. „Veel Glück“ wünscht he en falschen Fründ, den he wegschickt. „In disse Tied“ is dat Miteenanner vun de Minschen sünnerlich wichtig.

All tosomen lett sik seggen, dat düsse CD bannig goot to hören is un sik dat lohnt, nipp un nau op de Texten to luustern. Denn de passt jüst so goot as de Musik „In disse Tied“.

Gerrit Hoß: PLATT!, Plexitone Records 2015, Gesamtspeeltiet 42,25 Min., to kriegen över de Homepage vun Gerrit Hoß – http://www.gerrithoss.de/ oder bi plattschapp.de för € 13,99

 

Petra Kücklich

Heft Artikel von: Kücklich, Petra