No de wunnerbore plattdüütsche CD „De anner Steerns an d’ Heven“ vun 2009 un de hoochdüütsche „Stein aus Gold“ ut 2012 gifft dat nu ennelk wedder en niege plattdüütsche Spegelschiev vun Otto Groote un sien Ensemble. „Noordlandwind“ is wedder en echte Otto Groote-CD worrn. De wunnerbore Gesang, foken mehrstimmig, harmoneert grootordig mit de Guitarren vun Otto Groote un Matthias Malcher un den Bass vun Ralf Strotmann. Männichmol warrt noch anner Instrumente dortohoolt as Banjo oder Mandoline. In de Musik kann een foken Delen vun Folk finnen. Man dat Otto Groote Ensemble hett al lang sien egen Richt funnen, de nich to verwesseln is. Dat is ok bi düsse CD wedder düütlich to heuren. Dat Platt kümmt ahn Twiefel ut Oostfreesland. Man no en kottet Inheuren is dat ok för anner Plattsnacker goot to verstahn. To’n Nolesen sünd de Texten ok wedder in dat lütt Heft bi de CD afdruckt so as en poor Sätz to den Achtergrund vun jeedeen Stück.

Man liekers is bi düsse CD wat anners: Se hett en Thema, dat de Texte tohoopfaat. In de eersten söven Stücken geiht dat üm’t Utwannern, üm dat Achter-sik-loten vun dat ole Leven un Hopen op en Nieget. Bi de Arbeid an düsse Stücken in de verleden Johren kunnen se nich weten, wo aktuell düt Thema jüst nu wedder warrn schull.

En Reeg Stücken sünd Översetten vun Leders ut Schottland oder Irland oder ok Texten vun dor, to de Otto Groote denn sülvst de Musik schreven hett. Wat dat nu Wehmoot un dat Lengen no de ole Heimat is, Toversicht un Hopen oder de Freeheet, wat Nieget antofangen, Otto Groote mookt in sien Musik düt Föhlen lebennig. Männich Leed kann ok licht to’n Ohrwurm warrn so as de Översetten vun dat Leed „Sailing to Alaska“ vun den amerikoonschen Ledermoker Si Kahn. Nodem ik dat op dat Kunzeert heurt harr, bün ik noch männich Daag no Alaska seilt. Dat Stück „Kien Fragen un kien Blieven“ gifft dat an’t Enn vun de CD ok nochmol ahn Text. In dat lütt Heft bi de CD heet dat dorto, een kunn dat ok bannig goot för en Töövslööf vun en Telefonutkunft bruken. In „Land vull Hoop, Land vull Tran’n“ warrt vun de foffteihnjohrige irische Deern vertellt, de 1892 as Eerste an den Slagboom vun de niege Opnohmstatschoon för Utwannerers op Ellis Island in New York vöbigahn is. Claus Dreier hett dat irische Leed in’t Plattdüütsche översett .Ik glööv, dat kunn mien neegsten Ohrwurm warrn. Dat Leed „Saro“ hett mi sünnerlich tofoot kregen. Dat hannelt vun een Mudder, de ehr lütte Dochter Saro Jane op den Tog no Westen doot bleven is un de se nu jichtenswo an’n Rand vun Weg to Graff bringen mutt. So en Schicksol gifft dat ok in mien Familiengeschicht vun de Flucht ut Ostpreußen.

En anner Thema hett „Dat Leed vun Esterwegen“: In Esterwegen weer en Konzentrationsloger vun de Nazis. Dor hebbt se vele Lüüd insparrt, de jüm politisch nich no de Mütz weern. De hebbt se denn to sture Arbeid in’t Moor dwungen. Een dorvun weer Carl von Ossietzky. In en anner Loger hebbt se dunntomol dat Leed vun de Moorsuldoten erfunnen. Otto Groote singt vun dat gräsige Schicksol vun düsse Lüüd un vermohnt, dat wi dat nich vergeten dröfft, ofschoonst dor vundoog nich mehr veel vun to sehn is, wat dor mol gebört is.

Denn gifft dat noch twee Leders vun de Leevde, de mit soveel Hopen un Verwachten anfangt un foken liekers jichtenswann vergeiht. Dat Leed „Aragon Mill“ vun den amerikonschen Ledermoker Si Kahn hett Detlev Kolze översett. Dat vertellt vun „De groote Fabrik“, de dichtmookt worrn is, un de Lüüd ahn Utkomen trüchlett. De Översetten „De Mann, de ik was“ vun Richard Thompsen sien Leed „How will I ever bi simple again“ dör Claus Dreier un Otto Groote vermahnt doran, wat Krieg mit de Welt un de Minschen mookt. Ok dat is jo vundaag so aktuell as dat man ween kann.

De Musik op de CD is heel scheun, liekers de Themen vun de Texten dat gröttstendeels nich sünd. Man jüst op düsse Oort finnt se ehren Weg to uns Föhlen un mookt nodenkern un weekföhlig. För jeedeen, de sik nich blots högen will, lohnt sik de CD.

Otto Groote Ensemble: Noordlandwind, to bestellen över Otto Groote sien Internet-Siet www.otto-groote.net ünner Kontakt

Heft Artikel von: Kücklich, Petra