Dat lütt Book vun Heiko Gauert is mi kortens in´e Hannen fullen; dat weer so griepig. As ick mi mit mien Quickborn-Kollegsche so´n beten doröver uttuscht heff, hett se meent, dat ehr eerste Idee to dat Book „quadratisch, praktisch, goot- so as de Schokolaad“ ween wöör. Un genau dat heff ick ok dacht un bün neeschierig worrn. Kann en Schriever op 80 lütte Sieden de Geschicht vun de plattdüütsche Spraak in de nödige Deepde un heel akkurat opwiesen? Nee, dat geiht nich un mi dücht, dat wöör ok gor nich Heiko Gauert sein Ansinnen.

He vermiddelt blots en eersten vergnöglichen Inblick dorin, wat för en Weg dat Plattdüütsche in de vergahn Johrhunnerten nahmen hett. He schnitt an, woneem de Spraakgrenze vun Plattdüütsch na datMiddelhochdüütsche verlööp. Gauert verklort, dat dat Platt vun den´n Völkerstamm vun de Sachsen herkummt un worüm dat nix mit dat hüttige Bunnesland Sachsen todoon hett. Dor snackt seker kum een Platt, man in Ingland, Nedderlannen odder Däänmark findt wi Wöör, de na dat Plattdüütsche slagt. Gauert wiest kort op, dat Platt keen Dialekt, sonnern en egen Spraak is, mit de in’n Middelöller nördlich von de Benrather Linie meist allens snackt un schreven wörr, so as de Kooplüüd in’e Tiet vun´e Hanse. Woans sick uns Spraak dorna henbegeven hett un woans dat nu um ehr steiht, findt sick denn ok noch in dat Book.

Allens is man blots täämlich knapp anreten un dorüm harr ick den Titel anners nömt, villicht: „Die plattdeutsche Sprache – ein kurzer Einblick in ihre Geschichte“. Man allens op Platt! Denn ick findt´t schaad, dat dat Book op Hochdüütsch schreven worrn is, liekers heff ick Lust kregen, mehr över de Geschicht vun de plattdüütsche Spraak to lesen. Ok wenn ut Sicht vun Wetenschopsminschen de Inholt sachts veel to wenig is, för den normalen Leser is he en eersten interessanten Happen. Hier is mi dat so as mit Schokolaad gahn, so en lütt Stück maakt Aptiet op mehr.

 Heiko Gauert: Die Geschichte der plattdeutschen Sprache,

Hamburg 2017, Quickborn-Verlag, ISBN 978-3-87651-445-1

Sonja Dohrmann

Heft Artikel von: Dohrmann, Sonja