Nedderdütsche Ierstupführung an de Nedderdütsche Bühne von Nigenbramborg harr an‘n 12. November 2016 dat Stück „Lysistrata e.V.“ von Beate Schäfer in de nedderdütsche Version von Arnold Preuß.
De Niegenbrambörger Amateure hebben sick en Stück utsöcht, dat twors heiter un männigmal bannig deftig is, liekers äwer en iernstes Thema in sick hett: De Lüd von den Gorenverein „Harmonie e.V.“ sallen ümsiedelt warden, dat eine Möbelhus-Firma up den Platz wat Nieges bugen kann. Nu is in den Verein allens annere as Harmonie tau finnen, ganz as in’t richtige Läben sünd de Meinungen äwer Unkrut un Rasenmeihgen ünnerscheidlich. Un ok hier wiest sich en Vörsitter as son sülwsternannter Blockwart un malträtiert de Vereinsmitglieder. Äwer de Frugens sünd mal wedder de vernünftigsten. Se verbünden sick gegen dat Möbelhus un ok gegen de Mannslüd as in olle Tieden Lysistrata dahn hett, se träden in den Sexstreik. De Mannslüd äwer kümmern sick miehr üm de hübsche Russin Irina, de hier en Goren arwt hett. Gelägenheit för hübsche Inlagen: „Party ahn Musuika is as Putin ahn Pierd“ oder dat in beste russische Utsprak sungene „Katjuscha“. Bi de Afstimmung tau de Ümsiedlung verlieren de Gegner, un de Bagger rullen an. In dese trurige Situation kümmt de Erlösung. Cora Knöterich (Renate Stolpmann, de Umweltschützerin, leider blot as Karikatur dorstellt) verkündet, dat hier en selten Vagel, de „grüngefederte Rotschwanztrappe“, tau Hus is, de Bugenehmigung ward trüggtreckt, dat Lewen in de „Harmonie“ kann wiedergahn.
Dat Stück würd ünner de Regie von Ricarda Zunk förfötsch spält. Dat Plattdütsch von de Dorsteller wier allerbest. Leider wiest dat Programmheft den Titel in Fraktur ut. So oltbacken wier dat Spill jo gor nich! Sülwstverständlich beiden grad de wedderdänschen Rullen gaudes Futter tau richtige Komik. Un so brillierten de beiden Hauptpersonen Karin (Dagmar Kownatka) un Friedrich (Eduard Frambach) mit vergnäugliche un ok mit innige Szenen.
De starke Bifall wieste de Verbunnenheit von de Nedderdütsche Bühne mit sien Publikum, dat sick bannig amüsiert hett.
Lysistrata e.V. – Komödie von Beate Schäfer – Niederdeutsche Fassung von Arnold Preuß
Niederdeutsche Bühne Neubrandenburg – Regie: Ricarda Zunk
Premiere: 12.11.2016
Nächste Vorstellungen: 26.2., 26.3., 14.5. jeweils 16.00 Uhr Schauspielhaus Neubrandenburg, 18.3. 16.00 Uhr Bürgersaal Waren.
Heft Artikel von: Nenz, Cornelia