Vörurdeelen, Utgrenzen, Snacken öber annere, wi sünd gau bi de Hand mit „Ik weet Bescheed“. De Bambusen sünd gau utmookt un wi stoht dor mit’n rein Geweten: „De annern seggt / doot dat doch ook“.

Dit Problem treckt sik as rode Faden dör’t Heft. Eenmol sünd dor de Geschicht vun Christl Twenhöfel un de Glosse vun Hans-Hermann Briese. Denn hebbt wi dat waagt un hebbt mol wedder een Hörspeel afdruckt. Heinke Hannig sall dit Johr in Bämsen den Hans-Henning-Holm-Hörspeelpries tosproken kriegen. Dat Stück heet heel sacht „Summernacht“. Man wat dor achter stickt ….

Denn hebbt wi enen lütten Opsatz tostüürt kregen: „Mein französisches Knie“. Helge von Giese, een Journalistin, de veel in Europa ünnerwegens is, hett hier öber een groot Manko in ehr Leven schreben: Se kann keen Platt snacken. Dat ehr wat fehlt hett se erst markt, as in anner Länner de Lüüd jemmer Dialekten bruukt hebbt, as geev dat gor nix anneres. Un se weer, so hett se mi vertellt, as nokomen Kind de Eenzigst in de Familie, mit de blots Hoch snackt wöör. Se sull sik mit Platt nich „belasten“. Nu, merrn in ehr veertiger Johren fangt se an un lehrt Platt. Dat Vörurdeel vun ehr Öllern hett ehr fix wat wegnohmen, weet se hüüt.

Ook ik bün nich free vun un glööv an „Hörensagen“. Dat heff ik markt bi dat Interview mit de Musikgrupp „Gitta Franken –Dreebladd“. Mit Recht hett Gitta Franken mi trechtstött.

Un sogor in „Dat Letzt“ hebbt wi dat mit (Vör-)Urdeelen to doon. Dösigkeit vun de een oder Grotsnutigkeit vun de anner Siet?

Man dat Heft hett noch mehr in sik: De Tiedschrift DIESEL  harr nu al de hunnertste Utgaav. Bolko Bullerdiek graleert mit’n Opsatz.  De Autor Konrad Hansen is mit een Plakette an sien Öllernhuus ehrt worrn. Un de Quickborn-Reporters weern ook wedder veel „Op Besöök“.

Un de sülvst aktiv warrn will, de sall man no de Bämsen-Dagfohrt komen vun’n 15. bit 17. September. Mehr to’n Mitmoken finnt ji bi „Ut’n Quickborn“.

Veel Spooß

Heft Artikel von: Straumer, Ingrid