ji hoolt en echte Premiere in joon Hannen: Düt is dat eerste
Heft, dat wi beide in egen Verantworten tohoopklütert
hebbt. Nu müchen wi natürlich geern weten, woans jo dat
gefallt. Also man to, schrievt uns, wenn jichtenswat nich
no joon Mütz is. Över Loff freit wi uns ok, kloor.
Un dat gifft noch wat Besünners: To den 200. Geboortsdag
vun uns groten plattdüütschen Schriever Klaus Groth, den
wi düt Johr fiern köönt, hebbt wi en extra Rubrik inricht.
Dor schüllt ji düt Johr in jeedeen Heft wat över em un de
Veranstalten to sien Ehr to weten kriegen.
Man wi hebbt noch en Geboortsdag to fiern: Uns leve Maat
Bolko Bullerdiek, ahn den wi uns den Quickborn gor nich
vörstellen köönt, is düt Johr 80 Johr oolt worrn. Wi graleert
em vun Harten un wünscht em Gesundheit un dat he noch
lang mit uns för uns Quickborn warken kann.
Wi koomt ut’t Fiern gor nich mehr rut, denn wi wüllt noch
en groten Plattdüütschen ehren: De Quickborn-Vörstand
hett besloten, dat Claus Schuppenhauer, de nu al 60 Johr
Liddmaat vun uns Vereen is un bannig veel för’t Plattdüütsche
doon hett, vun nu af Ehrenmaat vun’n Quickborn
ween schall.
Bi de Literatur finnt ji in düt Heft al de verscheden Ennen,
de uns Lesers uns to de Geschicht „Bliev stahn“ vun
Marianne Ehlers, de wi in’t letzte Heft blots halv afdruckt
harrn, tostüert hebbt, un kloor, ok dat „echte“ Enn vun Marianne.
Wi freit uns över dat kreative Echo vun uns Lesers
un dankt för’t Mitmoken. Ok sünst freit wi uns jümmers,
wenn ji uns wat för’t Heft tostüern doot. Man bidde nich
füünsch warrn, wenn wi mol wat nich afdrucken köönt.
Wi hebbt ok nich allens nieg mookt in uns Heft un so finnt
ji ok wedder Opsätz, wat för de Lütten, Rezensionen un
Norichten ut de plattdüütsche Welt. Dorför geiht en groten
Dank an Christiane Batra, de wedder so fein all de Norichten
tohoopsammelt hett.

Veel Pläseer bi’t Lesen wünscht Sonja Dohrmann un Petra
Kücklich.

Heft Artikel von: Dohrmann, SonjaKücklich, Petra