Leve Maten un Frünnen,
Water hett dat in de verleden Weken noog geven. Nich blot
in Westdüütschland, ne ok hier bi uns in Hamborg, Sleswig-
Holsteen, Neddersassen usw. stunnen Straten, Dörchgäng
un -Fohrten as ok Keller ünner Water. So is doch de Een oder
Anner nich blot wegen Corona tohuus bleven. So harr ok ik
Tiet, düt Heft mit uns Redaktschoonsteam tohopen to stellen.
So hebbt wi ünner Literatur wedder schöne ne’e Saken to‘n
Lesen. Bolko Bullerdiek hett ünner Literatur Stücken vun
Schrieverslüüd rutsöcht, de nich mehr ünner uns sünd, aver
de wi ok nich vergeten schullen. Düt Erinnern wüllt wi in de
neegsten Heften wiedermaken.
Veer Schrieverslüüd hebbt schreven, woans se to dat Plattdüütsch
Schrieven komen sünd. Jeedeen harr en Ansporn.
Un dat köönt jüm ünner »So fungen se an« lesen.
Graleren wüllt wi düt mal ok. De wi gralleert, de kummt ut
uns egen Regen un dat al siet lange Tieden. Dorto gifft dat ünner
Literatur ok ehr eerst Leesstück, wat wi utmaken kunnen.
Twee Fundstücken hebbt wi ok in ole Böker funnen. Bi dat
Eerste kann een dat Schreven düden un bi dat Twete mal
Tohuus söken, ob dor in en Schapp oder op’n Böhn noch
»Hummeln« liggen doot. Wenn jüm wat hebbt, man to!
Ünner »Op Besöök« gifft dat ja in düsse Tiet nich alltoveel to
schrieven. Aver op Besöök weren wi doch.
Un nich vergeten: Uns Johreshööftversammeln an’n
Sünnavend, d. 30. Oktober 2021 in Hamborg
(Kiek in Heft 2/2021 Siet 67)
Hebbt jüm sik al anmellt?
Liekers hett de Redaktschoon in düt Heft wedder en bunten
Struuß an Bidrääg tohoopstellt un wünscht jüm veel Pläseer
bi’t Lesen.
Ik wünsch jüm un uns all beste Gesundheit un wi seht uns:
30.Oktober!
Hannes Frahm
Heft Artikel von: Frahm, Hannes