Een Musical vun Michael Stewart & Jerry Herman, Plattdüütsch vun Hartmut Cyriacks & Peter Nissen
De Geschicht: Dolly Gellinger Meyer is Wittfru un verdeent sik ehrn Levensopwand dormit, dat se Heiraten vermitteln deit. Ehr Schlachtroop is: Laat mi dat maken! De Opdrag, för Roland van der Gelder de rechte Fru ut de Hamborger Gesellschaft to söken, verlangt egens all ehr Professionalität, denn Roland, de Fodermiddel- un Getreidehändler, een Wittwer, is Halv-Millionär un kann wat verlangen. Se süht sik allerdings al sülben an de Sied vun düssen Griesgram. Se hett mit ehrn Ferdinand wunnerbar Johren hatt, se hebbt dat Leven utkost. Man nu, wenn se de Katt rutlaten hett un de Döör afsloten, denn markt se, dat se alleen is, un dat Leven geiht an ehr vörbi as een Paraad, wo se bloots an den Rand steiht. Un so bitt se denn ehrn Ferdinand selig üm een Teken, dat he ehr tostimmt bi de Söök vun een Mann för sik sülben. Ferdinand harr jo doch ümmer seggt, dat Geld nich all’ns is, dat is as de Mess, denn man utstrei’n mutt, dat dor wat op wassen kann. Avers nu, düssen Roland, den dat bloots üm Geld un Ansehn geiht, un för den all’ns bloots een Geschäft is… Kann dat good gahn?
Man dat kümmt nu so, as dat na Dolly ehrn Gusto kamen sall. Avers wat mutt nich all’ns passeern, bit dat so wied is. Roland reist na Hamborg, üm sik de Fruu’nslüüd antokieken, de Dolly för em utsöcht hett. Sien beiden Angestellten, Cornelius un Barnabas, wüllt ok mal wat vun de grote Welt sehn: Fruunslüüd un Elefanten. Roland van der Gelder is sowat vun verqueer, he is jo wol mallerich, dat he sik op sowat as een Fru-Söken inlaten hett. He kümmt mit Irene nich kloor un mit Ernestine ok nich. Sien beiden Angestellten funkt em överall dor twischen. Un in dat Nobel-Etablissement op St. Pauli is op eenmal sien Breefdasch weg. He is so verdattert, ward pulterig un aggressiv un kriggt dat mit Polizei un Justiz to doon. Dat dat hier nu all’ns so dummerhaftig löppt, kümmt Dolly egens ganz good to Pass. Dat he nu vun Fruu’nslüüd överhaupt nix mehr weten will, versteiht se bloots allto good. Avers se hett noch een ganz besünner Fru in Petto för em – werkeen dat wol is?
Un denn wedder in Soltau in de Fodermittel-Handlung. Dor dükert Dolly op, üm den griesmuligen Kanten-Klotz vun Roland van der Gelder de Minschlichkeit to lehren. Ganz bilütten markt he dat, wat düsse Fru för em bedüden kunn. Un op’t letzt geiht em dat op un he bringt dat över de Lippen: Geld is nich allens. Dat is mehr so as de Mess, den man utstrei’n mutt, dat överall wat wassen kann. – Süh, dat is dat Teken, op dat Dolly töövt hett. Nu is de Döör to dat Leven wedder open för ehr – un nich bloots för ehr. Un Roland kann op eenmal wedder smuustern un föhlt wedder as een Minsch. Dat is de Punkt, op den düsse kunterbunte Geschicht tolöppt: Dat is nich good, dat de Minsch alleen is.
Över dat Stück: Dat Besünner an düsse Premier weer to Anfang een wunnerbor Laudation op Frank Grupe, de nu den Rentenstand faat kregen hett un inskünftig nich mehr mutt, avers allemal noch dorbi sien kann un ok will. He höört sied 2004 to dat „Inventar“ vun dat Ohnsorg-Theater as Regisseur, Autor, Översetter, Arrangeur un as Schauspeler, een Multitalent un Glücksfall för Ohnsorg.
Avers denn güng dat los mit dat Stück, dat dat ganze Huus wackeln dä. Vör dat Postkoorten-Idyll vun Hamborg in den Anfang vun dat 19. Jahrhunnert mit de ole Jacobi-Kark in den Achtergrund speel sik nu een Fest för Ogen un Ohrn af. Un achteran weer dat Publikum ut Rand un Band un hett de Schauspeler mit „standing ovations“ un Hannenklappen op de Bühn fastnagelt. 17 Lüüd weern dor vörn in Gang. Dat weer een Droom as ut een Kaleidoskop: Kulisse, Köstüme, Dialoge, Ballett, Gesang un Danz… schillern-bunt, turbulent un lachkitteln witzig. Un över allens de bekannten Melodien, de noch lang in de Ohrn sitten blievt. Dat Ohnsorg-Theater hett Hamborg mal wedder beschenkt mit een opmuntern Stück, so dat wi den Afstieg vun den HSV een beten beter verkraften köönt.
Wer mitspeelt hett: Sandra Keck as Dolly – Beate Kiupel un Christin Deuker as Heirats-kandidatinnen – Till Huster as Roland van der Gelder – Christian Richard Bauer un Markus Gillich as Angestellte – Erkki Hopf, Luisa Röhse, Tanja Bahmani, Robert Eder, Horst Arenthold un noch söss Schauspeler ut dat Ensemble „Hallo Dolly“.
Ohnsorg Premiere: 27.5.2018, löppt bit 8.7.2018
Heft Artikel von: Denker, Cord