Al op de Titelsiet vun dat Book warrt ankünnigt, dat gifft twee Dode vör Neewark. Nu heff ik jo al vun’e eerste Siet an dor op luert. Wannehr dükert de eerste Liek op? Man toeerst warrt een wies, dat is en Schoolmeester-Roman. Dor warrt vun de School vertellt, vun’t Kollegium un den Bedriefsutfloog no Neewark. Ik weer jo meist hiddelig, as no dat Wattwannern jümmers noch keen Liek in Sicht weer. Allens heel normol. Op Siet 17 weern denn för de Rückfohrt twee Korten toveel. Oha, heff ik dacht, dor is denn jo doch wat malöört. Man den Verteller un Organisator vun den Utfloog stöört dat as’t lett nich sünnerlich. He hett to düsse Tiet jo ok nich wusst, wat ik al wüss. Ok dat een vun de Schoolmeesterschen sülvst twee Doog loter noch nich wedder in’e School opdükert un sik ok nich mellt, warrt denn eenfach so hennohmen. Mi dücht, bi mi in’t Büro harrn se dor beten mehr Alarm mookt. Eerst as se vun de Liek in’t Blatt leest, koomt de Lüüd in’t Gruveln. Man denn is ok al de Kripo in’e School. Mehr will ik hier ok nich verroden.
In dat Book warrt een veel wies vun den Afloop in so’n School un dat Miteenanner vun de Kollegen. De Schriever is sülvst Schoolmester west. De kennt sik denn jo ut. Den Roman kann een licht so blangenbi weglesen un warrt goot ünnerholen. Man mi hett so beten de orrige Spannung fehlt. So’n lütt Gräsen is dor nich bi opkomen. Ik harr ok nienich en Problem, dat Book twüschendrin mol an’e Siet to leggen. Man jümmer suutje, kannst ok morgen noch wiederlesen. Mag ween, dat liggt an den Verteller. De is as’t lett ok nich so licht ut de Roh to bringen. Dat Book is in „Ik-Form“ as een Oort Daagbook schreven. Liekers heff ik mi bi’t Lesen jümmers as Tokieker vun buten föhlt. Ik kunn mi dor nich rinversetten.
De Sätz un ok männicheen Woord in den Roman lett mi an Hoochdüütsch denken. Ik harr to’n Bispill nich „Grinsen“ oder „getrennt“ schreven. Man villicht is dat in Günter Ihmels sien Platt so bigäng. Ik wörr düt Book tominnst nich vunwegen dat scheune Platt nochmol lesen.
Günther Ihmels: „Doot as Schiet“, Isensee-Verlag 2014, 80 S., ISBN: 978-3-7308-1100-9
Heft Artikel von: Kücklich, Petra