In foffteihn Johrn Bandgeschicht kümmt al orrig wat tohoop, Dat läppert sik even. Un so hebbt DE FOFFTIG PENNS ok jümehr Afscheeds-CD nöömt. DE FOFFTIG PENNS sünd Malte Battefeld, Jakob Köhler un Torben Otten un se mookt coolen Elektro-Hip Hop op Platt. Hebbt mookt, mutt een seggen, denn nu hebbt se künnig mookt, se wüllt för jümmers Foffteihn moken mit jümehr Band. Man to’n Afsluss hebbt se noch en CD mit »Dat Beste vun de Fofftig Penns« rutbröcht. De gifft dat sogor op Vinyl un klor elektroonsch to’n Rünnerloden op dien Rekner oder Smartphone. Dat is ok wirklich en Mix ut ole un niege Songs worrn. Anfungen mit den sachts gröttsten Hit Löppt un anner Klassikers, de op jümehr eerste Spegelschiev Dialektro ut 2013 op weern, as Ik mutt gor nix, Butenland un even Dialektro, as DE FOFFTIG PENNS ehr Musik sülvst nöömt. Vun de twete Spegelschiev Een vun de fofftig Penn“ ut 2014 finnt wi den Titelsong Een vun de Fofftig un Schuggel dien Moors. Beide orrige Mitmook-Songs, de op’e Kunzeerten för Stimmung sorgen. Denn sünd dor noch de Songs to heuren, de in de letzten Johrn blots elektroonsch rutkomen sünd as de Werder Bremen-Hymne Gröön un Witt un Dascha’n Ding ut 2015, de plattdüütsche Version vun An der Nordseeküste no de Vörlaag vun un mit Klaus un Klaus un Günnen ut 2016 un ut dat Johr 2017 Duuster tohoop mit den Bremer Musiker Flo Mega un mit orrig Ohrwurmpotential. Nich blots den Refrain »Dat Leven hier is duuster, zappen zappen duuster. In Noorden steiht de Sünn nie. Un deswegen is de Heven riddi duuster, zappen zappen duuster« kannst foorts mitsingen, man ok vun’n restlichen Text kann een no’n poormol hören dat mehrste verstahn. Mit deepdenkern Texten mutt een DE FOFFTIG PENNS nich reken. Hauptsook dat passt to’t Thema un dat Riemeln klappt. Se nehmt dat mehrste so as ok sik sülven nich allto eernst un hebbt witzige Ideen. So mookt ok de Texten eenfach Spooß. Ok en Wiehnachtssong is op de CD. As’t lett geiht dat ok hier bi de Plattdüütschen nich ahn. Extra för düsse CD rutbröcht hebbt se den Titelsong Dat läppert sik in den se beten wunnerwarken doot, wat ut de fixe Idee vun dunntomol allens worrn is. Un to’n Dank den Titel Dor nich för. Bet op de letzen Regen »De fofftig seggt „Dank ok“ för all düsse Johrn. Ji hebbt uns to de maakt de wi denn ok worrn« is de Text ut tohoopkleite Riemels tosomenklütert, man een kann dor wunnerbor no danzen un dat »Dor nich för« ut’n Refrain blifft hangen. To’n Sluss gifft dat noch twee Remixes vun Duuster un Dascha’n Ding. De nu afsluuts weten müch, üm wat dat in’e Texten nipp un nau geiht, kann de in dat lütte Book bi de CD nolesen, wenn he denn en Lupe proot hett. Wokeen sik en lütten Överblick över de Musik vun DE FOFFTIG PENNS moken will oder sik en Erinnern an de eerste plattdüütsche Elektro-Hip Hop-Koppel sekern oder eenfach geern mol coole Beats op Platt hören mag, de gode Luun mookt un na de een prima danzen kann, de schall sik de CD man köpen. Liekers, op’t best weern DE FOFFTIG PENNS life, man dat is jo nu vörbi, schood.
Dat läppert sik (CD) vun DE FOFFTIG PENNS, Welcome Home Musik, Groove Attack 2018
Heft Artikel von: Kücklich, Petra